З нагоды Дня інвалідаў Рэспублікі Беларусь у раёне праведзена ўрачыстае мерапрыемства
З нагоды Дня інвалідаў Рэспублікі Беларусь у раёне праведзена ўрачыстае мерапрыемства. Яго арганізатар — Карэліцкая аб’яднаная арганізацыя ГА “Беларускае таварыства інвалідаў” пры падтрымцы ДУ “Карэліцкі раённы Цэнтр культуры і народнай творчасці”.
Па пытаннях
тэлефанаваць
у ЦСАН
Звяртаючыся да ўдзельнікаў сустрэчы, начальнік упраўлення па працы, занятасці і сацыяльнай абароне Карэліцкага райвыканкама Іна Аляксандраўна Богуш адзначыла, што гэты дзень дае магчымасць задумацца над тым, ці ўсё робіцца ў краіне і намі асабіста для таго, каб падтрымаць людзей з абмежаванымі магчымасцямі. Галоўнае — дадзеная катэгорыя грамадзян павінна быць у страі і адчуваць пра сябе клопат.
Вялікую падтрымку інвалідам аказваюць Цэнтр сацыяльнага абслугоўвання насельніцтва, сельскія Саветы, СВК, дзе добра ведаюць іх праблемы і імкнуцца вырашыць. Іна Аляксандраўна заклікала разумець запыты дадзенай катэгорыі грамадзян і аказваць ім дапамогу.
Дырэктар ДУ “Цэнтр сацыяльнага абслугоўвання насельніцтва Карэліцкага раёна” Інэса Мікалаеўна Семібратава паведаміла пра аказанне паслуг гэтай дзяржаўнай установай. Дарэчы, тут працуюць таксама з людзьмі з абмежаванымі магчымасцямі, якія з’яўляюцца актыўнымі ўдзельнікамі фестываляў, конкурсаў, выстаў, акцый. Са станоўчага боку адзначыла работу супрацоўнікаў дзённага аддзялення для грамадзян састарэлага ўзросту, якія знайшлі тут сабе заняткі па інтарэсах.
Інэса Мікалаеўна запрашала інвалідаў карыстацца паслугамі пральні, швачкі, пракату — кошт на паслугі ў Цэнтры сацыяльнага абслугоўвання насельніцтва значна ніжэйшы. Зазначыўшы, што ў далейшым яны не будуць пакінуты без увагі і дапамогі, прамоўца заклікала пры ўзнікненні хвалюючых пытанняў тэлефанаваць у Цэнтр па нумары : 2-11-97.
Раздзялілі
радасць сустрэчы
Што лепш можа ўскалыхнуць сэрца чалавека, чым вершаваныя ці музычныя творы? Сапраўды, як адвесці вочы ад добрага танца? Гэта дарылі людзям з абмежаванымі магчымасцямі самадзейныя артысты, і кожны нумар суправаджаўся гучнымі апладысментамі. Розныя па занятках і ўзросту, выканаўцы былі аднолькава поўныя жадання раздзяліць радасць сустрэчы з прысутнымі ў зале.
Дарэчы, Міхаіл Башко падарыў шчаслівыя імгненні не толькі як вядучы, але і як выканаўца цудоўных песень. Добрыя музычныя творы выканала і Алеся Швабовіч. Гумарыстычныя замалёўкі з вуснаў Васілія Чартко не пакінулі нікога раўнадушнымі. Ну а “Вясковая кадрыля” ўдзельнікаў калектыву “Спадчына” ДУ “Карэліцкі раённы Цэнтр культуры і народнай творчасці” ўразіла па-асабліваму.
І, вядома, глыбока запала ў душу і надоўга засталося ў памяці выканальніцкае майстэрства дзяцей. Дуэт баяністаў у складзе Вікторыі Дрык і Яўгенія Малышкі падарыў знакамітую “Кацюшу”. Трэба было чуць, як чытаў верш “Багаж” Эміль Касабуцкі! Выступленні вакальнай групы “Усмешка” Карэліцкай дзіцячай школы мастацтваў і ўдзельнікаў клуба “Белы тыгр” (кіраўнік Аляксандр Абадзінскі) прайшлі на “ўра”. Як добра, што ўсё-такі ёсць свае выканаўцы, якія шчодра дзеляцца талентам з землякамі і робяць нашы будні больш светлымі і сонечнымі.
Не абышлося на мерапрыемстве і без выступленняў тых, дзеля каго ладзілася гэтая сустрэча. Яна перарасла ў фестываль сапраўдных талентаў.
Старшыня раённага таварыства інвалідаў Вера Міхайлаўна Сашко выказала ўдзячнасць старшыням пярвічных арганізацый за сустрэчу і спадзяванне на тое, што яны надалей будуць традыцыйнымі, а выканальніцкае майстэрства членаў таварыства будзе расці і несці людзям добры настрой.
Галіна СМАЛЯНКА.
Фота Караліны КУЧУК.