Іўе адзначыла юбілейную дату беларуска-татарскай гісторыі
620-годдзе масавага перасялення татараў у Вялікае Княства Літоўскае прыехалі адзначыць госці з усяе Беларусі, з замежжа. Разам з землякамі гэту дату адзначыў муфцій Беларусі, які нарадзіўся і вырас у Іўі, — Абу-Бекір Шабановіч.
Павіншаваць іўеўчан-мусульман, правесці з імі святочны намаз прыехалі пасол Турцыі ў Рэспубліцы Беларусь Кезбан Нілвана Дарама і пасол Палесціны ў Рэспубліцы Беларусь Халед Арыкат, а таксама дэпутат Палаты прадстаўнікоў Нацыянальнага сходу Рэспублікі Беларусь Аляксандр Маркевіч. 
Госці горада мелі сустрэчу са старшынёй Іўеўскага раённага выканаўчага камітэта Аляксандрам Булаком, наведалі музей нацыянальных культур, сфатаграфаваліся ля візіткі горада – памятнага знака верацярпімасці, талерантнасці і згоды іўеўчан розных веравызнанняў, здзейснілі экскурсію па гораду з наведваннем хрысціянскіх храмаў, усклалі кветкі да помніка ў гонар воінаў, партызан і мірных жыхароў, якія загінулі падчас Вялікай Айчыннай вайны, а затым адправіліся на богаслужэнне ў іўеўскую мячэць.
Іўеўчане і госці горада наведалі татарскія могілкі (мізар).
У Цэнтры культуры і вольнага часу адбыўся канцэрт татарскага ансамбля “Лейсан” і лепшых творчых калектываў Іўеўскага раёна.
газета «Іўеўскі край»