Колькасць рабят, якія хочуць распараджацца сваім вольным часам у дні летніх канікул па-дзелавому, у Карэліцкім раёне з кожным годам расце. Рукі студэнтаў гатовы працаваць, душа засмуткавала па рамантычных зносінах з аднагодкамі, а карманы — па сваёй капейцы.
Чым будуць займацца студатрадаўцы ў новым працоўным семестры-2018 на тэрыторыі Карэліччыны, расказвае першы сакратар райкама ГА “Беларускі рэспубліканскі саюз моладзі” Яўгеній Андрэевіч Пархамовіч.
— Яўгеній Андрэевіч, нагадайце, колькі маладых людзей і ў якіх сферах працавалі ў мінулым годзе на летніх канікулах у нашым раёне?
— У 2017 годзе ў складзе 15 студэнцкіх атрадаў у нашым раёне адпрацавала 177 чалавек. 12 студатрадаў атрымалі работу ў мясцовых сельгасарганізацыях Карэліцкага раёна, два педагагічных на базе дзіцячага аздараўленчага лагера “Вясёлка” і адзін будаўнічы на базе мясцовага камунгаса.
— Цікава, колькі кожны студатрадавец змог зарабіць у сярэднім?
— Рабяты ва ўзросце ад 16 да 18 гадоў змаглі атрымаць у сярэднім па 100 рублёў зарплаты. Для такой узроставай катэгорыі падлеткаў прадугледжаны скарочаны працоўны дзень: 7 гадзін. Рабяты ва ўзросце ад 14 да 16 гадоў заняты яшчэ менш — 4,5 гадзіны. Тэрміны працы студатрадаў розныя: ад 10 да 30 дзён. ДП “Малюшычы”, напрыклад, заплаціў сваім юным працаўнікам каля 300 рублёў. Рабяты працавалі на зернесушыльным комплексе падчас уборачнай, таму і сума для студэнтаў атрымалася салідная.
— На якіх прадпрыемствах раёна моладзь будзе занята ў гэтым годзе?
— Колькасць арганізацый, якія прымуць моладзь у гэтым годзе, не змянілася. Гэта 10 сельгаспрадпрыемстваў, Карэліцкі камунгас і аддзел адукацыі, спорту і турызму Карэліцкага райвыканкама на базе дзіцячага аздараўленчага лагера “Вясёлка”. Плануем заключыць дамоўленасць з Мірскім замкам, дзе ў гэтым годзе будуць працягнуты раскопкі на месцы палаца Святаполк-Мірскіх. Кожнае лета туды прыязджаюць студэнты з розных краін свету.
— Што неабходна для таго, каб трапіць у студэнцкі атрад?
— Галоўнае — гэта жаданне працаваць. У студатрады прымаюцца маладыя людзі ва ўзросце ад 14 да 31 года. Неабходна напісаць заяву па месцы сваёй вучобы альбо работы на маё імя (першага сакратара Карэліцкага райкама ГА “БРСМ” Я. А. Пархамовіча). Альбо можна прыйсці ў Карэліцкі райвыканкам у кабінет 24 (другі паверх) і там пакінуць сваю заяву.
Неабходна прайсці медыцынскі агляд. Дарэчы, гэта робіцца абсалютна бясплатна. Калі жадаючаму працаваць няма яшчэ 16 гадоў, патрэбна пісьмовая згода бацькоў. Працоўнай моладзі неабходна характарыстыка з месца работы, якая, бясспрэчна, павінна быць станоўчай, а тым, хто яшчэ вучыцца, — даведка з навучальнай установы аб адсутнасці акадэмічнай запазычанасці.
Па пытаннях працы ў студэнцкіх атрадах неабходна званіць у Карэліцкі райкам БРСМ па нумарах: 2-06-60, 2-22-04.
— Колькі часу засталося ў маладых людзей, каб паспець запісацца ў студатрад?
— Вядома, чым хутчэй, тым лепш. Наогул заяўкі прымаюцца да канца летніх канікул.
— Што чакае нашу моладзь у гэтым годзе, аб’яўленым Годам малой радзімы?
— У гэтым годзе восенню ў Карэліцкім раёне адбудзецца занальны этап конкурсу “100 ідэй для Беларусі”. Нам выпаў гонар прымаць дэлегацыі Навагрудскага і Дзятлаўскага раёнаў. Плануецца, што моладзь у сваіх навукова-даследчых работах найбольшую ўвагу надасць краязнаўству і мясцоваму турызму. Пачынаем рыхтавацца да 100-годдзя ВЛКСМ, будзем сустракацца з ветэранамі камсамольскага руху Карэліччыны. Восенню плануюцца ўрачыстыя мерапрыемствы з гэтай нагоды.
Іна ЛЕЙКА.
