Новый учебный год начался в Мирской средней школе для 242 мальчишек и девчонок (фото)
1 верасня – гэта не толькі Дзень ведаў, але і пачатак самай рамантычный пары года – восені. Сотні шчаслівых усмешак, мар і спадзяванняў на тое, што з пачаткам новай пары пачнецца і новае жыццё. У каго? Канешне, у нашых цудоўных першакласнікаў!
Чароўнай музыкай і вялікім натоўпам бацькоў сустрэла нас сёння Мірская школа. Было відаць, што абсалютна для ўсіх гэты дзень доўгачаканы і асаблівы. Нехта сядзе за парту ўпершыню, а для кагосьці святочная восеньская лінейка стане апошняй у жыцці… Хвалявання не ўтаіць – эмоцыі ва ўсіх розныя, але, бясспрэчна, самыя шчырыя.
Сказаць добрыя словы і натхніць на плённую працу прыйшоў першы намеснік старшыні, начальнік упраўлення сельскай гаспадаркі і харчавання Карэліцкага райвыканкама Анатолій Мікалаевіч Коршун.
– Хачу пажадаць першакласнікам, каб гэта школа стала для іх роднай, а выпускнікам – вызначыцца са сваёй будучыняй. Наперадзе вас чакаюць школьныя экзамены і ЦТ, таму вельмі важна не губляць часу і якасна яго выкарыстоўваць, – параіў Анатолій Мікалаевіч.
Дарэчы, добрым падарункам для школы стаў новы камп’ютарны клас, які быў набыты на сродкі раённага бюджэту.
На сённяшні дзень Мірская сярэдняя школа налічвае 242 вучня, 28 з якіх – першакласнікі. Самыя маленькія, дарэчы, будуць спасцігаць новыя веды ў двух класах – з рускай і беларускай мовай навучання.
Падчас святочнай лінейкі выпускнікі дзякавалі роднай школе і яе настаўнікамі за цікавыя і інтарэсныя гады, а першакласнікі, яшчэ нясмелыя і разгубленыя, упершыню чыталі вершы. Здавалася, што пачуццё радасці і новых уражанняў напаўняла кожнага, хто прысутнічаў на гэтым свяце ведаў.
– 1 верасня – свята для ўсіх, а для настаўнікаў – у першую чаргу. Ведаеце, новыя вучні – гэта заўжды новыя эмоцыі. Іх радасныя і натхнёныя твары зараджаюць энергіяй кожнага педагога. Адразу хочацца даць першакласнікам усё лепшае, адкрыць для іх іншы свет, – дзеліцца эмоцыямі дырэктар школы Таццяна Ільінічна Шаплыка.
Дарэчы, свой першы дзень у школе жанчына памятае вельмі добра. Адзін з успамінаў – гэта вялікі скураны партфель, які ўручалі усім у дзіцячым садку. Таццяна Ільінічна з усмешкай прыгадвае, як потым у школу ўсе дзеці хадзілі з аднолькавымі. А калі школьнае жыццё і вучоба ва ўніверсітэце праляцелі, жанчына вярнулася не толькі на малую радзіму, але і ў родную школу, – ужо ў якасці дырэктара.
– Наша праца выдатная тым, што ў дзіцячым асяроддзі не адчуваеш сваіх гадоў. Ты застаешся такой жа маладой і поўнай энергіі, як і раней. Разам з вучнямі хочацца шукаць нешта новае, пазнаваць і развівацца, – расказвае Таццяна Ільінічна.
Папоўнілася Мірская школа не толькі новымі вучнямі, але і маладымі спецыялістамі. 1 верасня да сваёй працы прыступілі настаўніца англійскай мовы Юлія Андрэеўна Пятрова і настаўніца пачатковых класаў Дар’я Дзмітрыеўна Копаць.
Пасля ўрачыстай лінейкі першакласнікаў чакаў іх першы ў жыцці ўрок, прысвечаны Году малой радзімы. Кожнаму вучню былі ўручаны падарункі ад Прэзідэнта Рэспублікі Беларусь – кніжкі “Беларусь – наша радзіма”.
Што ж, будзем спадзявацца, што для кожнага вучня – першакласніка або выпускніка – гэты год абавязкова стане часам здзяйснення самых заветных мараў!
Вікторыя КАСЦЮК
Фота аўтара
