Новогоднее поздравление председателя Кореличского райисполкома Виктора Шайбака

⚜ Навагодняе віншаванне ⚜
старшыні Карэліцкага раённага выканаўчага камітэта
Віктара ШАЙБАКА

Паважаныя жыхары раёна!
Дарагія сябры!

Заканчваецца 2018 год, яго час вядзе свой адлік ужо на дні, і зусім хутка ён стане гісторыяй. Адыходзячы год быў напружаным і складаным, але разам з тым вельмі значным і адказным.

Для нашага раёна 2018 год стаў плённым, насычаным стваральнай працай і творчымі дасягненнямі. Нам практычна ўдалося рэалізаваць усе намечаныя планы, забяспечыць выкананне асноўных прагнозных паказчыкаў па ўсіх галінах дзейнасці.

Стабільна працавалі прадпрыемствы сельскай гаспадаркі і прамысловасці, гандлю і паслуг, калектывы энергетыкаў і дарожнікаў, установы адукацыі, культуры і аховы здароўя, аддзелы ўнутраных спраў і надзвычайных сітуацый.

Наш раён у чарговы раз увайшоў у тройку мацнейшых раёнаў Гродзенскай вобласці на ўборцы збожжавых і зернебабовых культур. Мы з’яўляемся лідарамі на Гродзеншчыне па ўраджайнасці рапсу. Наш раён уваходзіць у дваццатку мацнейшых раёнаў Беларусі па вытворчасці малака і мяса. Надой на адну карову з пачатку года склаў 6030 кг малака.

СВК «Свіцязянка-2003» у чацвёрты раз занесены на Рэспубліканскую Дошку пашаны за дасягненне высокіх эканамічных паказчыкаў. Уведзена ў строй новая малочна-таварная ферма «Райца-1» на 610 галоў дойнага статка.

Гэты год стаў знакавым для жыхароў пасёлка Мір, які ўключаны ў абласную інвестыцыйную праграму па добраўпарадкаванні. У старажытным мястэчку рэканструяваны вуліцы і вулічнае асвятленне, абноўленыя фасады будынкаў, паглыблена рэчышча ракі Міранка. Дзякуючы выдзеленым сродкам у Міры палепшыцца водазабеспячэнне.

Не перастаюць радаваць сваімі поспехамі вучні і навучэнцы Карэліччыны. Так, члены клуба «Віцязь», які дзейнічае пры Лукскай сярэдняй школе, сталі ўладальнікамі трэцяга месца ў фінале рэспубліканскай ваенна-патрыятычнай гульні «Зарніца». Нашы рабяты ўдастойваліся стыпендый абласной прэміі імя Аляксандра Дубко і Фонду міру.

Сфера культуры таксама дорыць нашай зямлі нямала перамог, у тым ліку і на міжнароднай арэне. Так, у гэтым годзе карэліччане заваявалі Гран-пры 17-га Міжнароднага маладзёжнага фестывалю сярод гарадоў-пабрацімаў «Новы свет» у горадзе Краснагорску. Ганна Кузьміч стала лаўрэатам трэцяй ступені на Міжнародным фестывалі мастацтваў BYFEST.

Пераможцам штогадовага абласнога агляду якасці і культуры медыцынскага абслугоўвання насельніцтва сярод урачэбных амбулаторый стала Турэцкая амбулаторыя. У гэтым годзе на базе Карэліцкай цэнтральнай раённай бальніцы пачата будаўніцтва аддзялення гемадыялізу, якое будзе здадзена ў эксплуатацыю ў 2019 годзе. Будуць працягнуты рамонтныя работы ў Карэліцкай раённай паліклініцы.

Кожны пражыты дзень адыходзячага года быў адзначаны працай і стараннем нашых людзей. Таму хачу сказаць словы вялікай удзячнасці ўсім працаўнікам раёна за плённую і добрасумленную працу на карысць карэліцкай зямлі і нашай Беларусі.

Я ўпэўнены, што 2019 год падорыць нам годныя перамогі, новыя дасягненні і адкрыцці, якія атрымаюць свой працяг у гераічным летапісе Карэліччыны. Уступаючы ў новы год з напрацаваным патэнцыялам, мы верым у свае сілы і ў тое, што з пастаўленымі планамі і задачамі мы паспяхова справімся.

Напярэдадні навагодніх святаў хочацца сказаць словы ўдзячнасці ветэранам вайны і працы за адвагу, працу і магчымасць нашым дзецям і ўнукам жыць у згодзе і міры.

Мы рады сустракаць на нашай карэліцкай зямлі маладых спецыялістаў усіх сфер народнай гаспадаркі і дзяліцца з імі назапашаным вопытам. Радуе тое, што для многіх з іх Карэліччына становіцца другой маленькай радзімай.

Паважаныя карэліччане!

Сардэчна віншую вас з Новым годам і Нараджэннем Хрыстовым! Скажам вялікі дзякуй адыходзячаму году за ўсё добрае, што было ў ім, напоўнім сэрцы дабром, святлом, любоўю і зробім упэўнены крок у новы 2019 год. Хай ён прынясе ўсім нам, беларусам, бліскучыя пачынанні і здзяйсненні, новыя сілы і імклівыя поспехі, мір і росквіт. Жадаю вам ніколі не збочваць з абранага шляху, дасягаць пастаўленых мэтаў, атрымліваць няпростыя, але ад таго яшчэ больш жаданыя перамогі!

Здароўя, дабрабыту і ўсяго самага добрага вам і вашым блізкім, стабільнасці і ўпэўненасці ў заўтрашнім дні.

⚜ З НОВЫМ 2019 ГОДАМ ВАС, ДАРАГІЯ СЯБРЫ! ⚜