Кореличчане обсуждают Послание Президента к белорусскому народу и Национальному собранию Республики Беларусь

🇧🇾 19 красавіка Прэзідэнт Беларусі Аляксандр Лукашэнка звярнуўся з Пасланнем да беларускага народа і Нацыянальнага сходу. Зварот лідара дзяржавы меў шырокі водклік сярод жыхароў краіны і Карэліцкага раёна.

🇧🇾 Руслан АБРАМЧЫК,
намеснік старшыні Карэліцкага райвыканкама,
старшыня раённай арганізацыі РГА «Белая Русь»:

— Як і кожная службовая асоба краіны, я фіксаваў у Пасланні не проста тэзісы, а канкрэтныя даручэнні, якія ў іх гучалі. Толькі сацыяльнай сферы нашага раёна неабходна прапрацаваць «дарожныя карты» не менш чым па сарака напрамках. Мы не будзем чакаць фармалізаваных пратаколаў даручэнняў вышэйстаячых органаў, аддзелы і ўпраўленні райвыканкама ўжо ў гэты панядзелак вызначыліся з пералікам мерапрыемстваў, у рамках якіх мы будзем на мясцовым узроўні выконваць пастаўленыя кіраўніком дзяржавы задачы.

Так, мы ўжо заняліся азеляненнем раёна: у школах і клубах закладзены тры яблыневых сада. Толькі на тэрыторыі ўстаноў адукацыі будзе пасаджана больш за 400 дрэў. Жылкамгас высадзіць больш за 7,5 тысяч кветак. Малая радзіма павінна быць цудоўнай і квітнеючай.

Будзе працягнута работа па ўмацаванні спартыўнай базы ўстаноў адукацыі і дзіцяча-юнацкай спартыўнай школы. Ужо цяпер Карэліччына актыўна рыхтуецца да прыёму турыстаў, прыезд якіх чакаецца гэтым летам на Другія Еўрапейскія гульні.

У мясцовай улады шмат пытанняў, якія трэба вырашаць. Гэта і павышэнне ўзроўню заработнай платы, і працаўладкаванне жыхароў раёна, і дапамога шматдзетным сем’ям, адзінокім пажылым грамадзянам, клопат пра здароўе і адукацыю карэліччан. Усе механізмы па гэтых напрамках у нас прапрацаваны, і мы паступова іх ажыццяўляем.

🇧🇾 Дзмітрый СКВАРЧЫНСКІ,
першы намеснік начальніка Карэліцкага РАУС:

— Як адзначыў Прэзідэнт, імклівае развіццё камунікацыйных тэхналогій адкрывае новыя магчымасці для злачыннага ўмяшання, несанкцыянаванага атрымання і выкарыстання дадзеных, у тым ліку асабістых.

Што датычыцца Карэліцкага раёна, удзельная вага злачынстваў, якія былі здзейснены з выкарыстаннем камп’ютарнай тэхнікі, у адносінах да агульнай колькасці правапарушэнняў з кожным годам няўхільна расце. Калі ў 2017 годзе былі здзейснены 3 злачынствы ў сферы высокіх тэхналогій, то ў 2018 годзе – 14. Па стану на 15 красавіка 2019 года ўжо зарэгістраваны 9 кіберзлачынстваў.

У Пасланні Прэзідэнт таксама закрануў пытанні барацьбы са злачынствамі і правапарушэннямі. Як адзначыў Аляксандр Лукашэнка, праваахоўныя органы на належным узроўні забяспечваюць грамадскі парадак і спакой грамадзян краіны. Колькасць асабліва цяжкіх злачынстваў за апошнія 5 гадоў зменшылася амаль на чвэрць. У раёне таксама назіраецца зніжэнне колькасці цяжкіх і асабліва цяжкіх злачынстваў: 2016 год – 22 злачынствы, 2017 год – 11, 2018 год – 6.

🇧🇾 Аляксей КАЎЦЭВІЧ,
намеснік галоўнага ўрача УАЗ “Карэліцкая ЦРБ” па медыцынскай часці:

— Тэма медыцыны не адзін раз уздымалася падчас Паслання Прэзідэнта. Сапраўды, здароўе беларусаў – гэта дабрабыт нашай краіны. І ў Карэліцкай цэнтральнай раённай бальніцы мы імкнёмся аказаць насельніцтву высокакваліфікаваную медыцынскую дапамогу. У першую чаргу, тут хочацца ўзгадаць нядаўна адкрытае міжраённае аддзяленне гемадыялізу. Апроч таго, нашы спецыялісты праводзяць высокатэхналагічныя аперацыі. Напрыклад, у сакавіку мы выканалі остэасінтэз пералому сцегнавой косці з фіксацыяй металічнай пласцінай і з трансплантацыяй фрагмента аўтакосці з картыкальным слоем у зоне пералома. Вялікая ўвага ў нашай ўстанове надаецца прафілактыцы захворванняў і папулярызацыі здаровага ладу жыцця. Бо, як адзначыў Прэзідэнт: “Без фізічнай актыўнасці, заняткаў спортам не будзе здаровых дзяцей, здаровых людзей, здаровай нацыі ў цэлым”. Мы рэгулярна праводзім акцыі, да нас прыязджаюць з кансультацыямі спецыялісты з вобласці. Адкрыты мы для дыялогу і на прасторах інтэрнэта: дзейнічае сайт, таксама ёсць і акаунты ў папулярных сацыяльных сетках. Да таго ж, нашы спецыялісты вядуць актыўную работу на перыферыі: кожны тыдзень па аўторках урачы раённай бальніцы выязджаюць на сельскія ўчасткі. Клапоцімся мы і пра ўзровень нашых працоўных кадраў, надаём увагу маладым спецыялістам. Так сёлета мы чакаем 12 урачоў, у тым ліку акушэраў-гінеколагаў, рэаніматолагаў, хірургаў. Такім чынам, мы робім усё, каб кожны жыхар нашага раёна меў свабодны доступ да якаснай медыцыны.

🇧🇾 Аляксандр ДАНІЎКА,
інспектар Карэліцкай раённай энергагазінспекцыі
Лідскага міжраённага аддзялення філіяла “Энергагазнадзор” па Гродзенскай вобласці:

— Мяне як спецыяліста зацікавіла ў першую чаргу тэма БелАЭС і тыя перспектывы, якія адкрываюцца перад энергетыкай краіны. Я лічу добрым паказчыкам тое, што будаўніцтва станцыі абышлося танней за лік належнага кантролю, прафесіяналізму спецыялістаў і выкарыстання мясцовых рэсурсаў. Ёсць упэўненасць, што мы станем менш залежнымі ад замежных паставак нафты і газа. А магчымасць будаўніцтва яшчэ адной АЭС умацоўвае гэтыя перспектывы. Як чалавека і грамадзяніна ў Пасланні Прэзідэнта мяне парадавала значная ўвага ўладаў да развіцця малых населеных пунктаў, да якіх належаць і нашы Карэлічы. Тут мой дом, праца, сям’я, сябры, і, безумоўна, мне хочацца, каб роднае месца жыло і развівалася.

Каментарыі падрыхтавалі Іна ЛЕЙКА, Аксана ЯНУШ, Марына КАЗЛОВІЧ