17 кастрычніка Упаўнаважаны па справах рэлігій і нацыянальнасцей Леанід Гуляка правёў у Карэлічах прыём грамадзян і “прамую лінію”, а таксама сустрэчу з кіраўніцтвам і духавенствам раёна.
Важным пунктам праграмы візіту стала абмеркаванне надзённых пытанняў разам са старшынёй Карэліцкага райвыканкама Віктарам Шайбаком, старшынёй раённага Савета дэпутатаў Аляксандрам Шкадавым і намеснікам старшыні райвыканкама Русланам Абрамчыкам.
Размова на актуальныя тэмы працягнулася ў Карэліцкай дзіцячай школе мастацтваў, дзе адбылася традыцыйная сустрэча Леаніда Гулякі з прадстаўнікамі ўсіх канфесій раёна. “Дзяржава займаецца інтарэсамі грамадзян, духавенства – прыхажан. А гэта – адныя і тыя ж людзі, і асноўныя мэты ў нас з вамі мала чым адрозніваюцца. Таму так важна ў самых розных пытаннях знаходзіць агульную мову, – падкрэсліў Упаўнаважаны па справах рэлігій і нацыянальнасцей. – Мне імпануе той факт, што ў Карэліцкім раёне наладжана супрацоўніцтва органаў мясцовай улады з рэлігійнымі арганізацыямі канфесій і нацыянальна-культурнымі грамадскімі аб’яднаннямі. Жадаю вам і надалей адносіцца адзін да аднаго з дыпламатычнай тактоўнасцю і разуменнем, захоўваць мір і згоду, а калі раптам узнікнуць спрэчныя моманты, то кіравацца літарай Закона і сумленнем”.
Таксама Леанід Гуляка адзначыў, што ў Гродзенскай вобласці міжканфесійны і міжнацыянальны дыялог арганізаваны на высокім узроўні: “Прынёманскі край вылучае ў дадзеным кірунку шэраг цікавых і маштабных праектаў, сярод якіх выключнае месца, для мяне ў прыватнасці, займае Фестываль нацыянальных культур у Гродне. Да таго ж, у 2020 годзе мы адзначым 550-годдзе цудатворнай Жыровіцкай іконы Божай Маці і 500-годдзе заснавання Свята-Успенскага Жыровіцкага стаўрапігіяльнага мужчынскага манастыра. Якраз гэта мы абмяркоўвалі нядаўна з расійскім паслом у Беларусі Дзмітрыем Мезенцавым. Увогуле, да святкавання такой знакавай падзеі плануюць далучыцца вернікі з розных краін. Упэўнены, што Гродзеншчына па традыцыі ўсіх сустрэне цёпла і гасцінна. Сёлетні Дзень пісьменства ў Слоніме цудоўна гэта прадэманстраваў. Увогуле, візітоўкай рэгіёна можна смела назваць такія рысы, як адкрытасць, талерантнасць і добрасуседства”.
З цікавасцю выслухаў Упаўнаважаны па справах рэлігій і нацыянальнасцей пытанні духавенства. Святароў хвалявала захаванне гісторыка-культурнай спадчыны, у прыватнасці шмат гаварылі пра постаць Ігнація Дамейкі, закранулі асаблівасці працы з падрастаючым пакаленнем і людзьмі сталага ўзросту. Таксама духавенства падзялілася меркаваннямі наконт развіцця рэлігійнага турызму, недастатковай колькасці святарскіх пакліканняў, адраджэння і будаўніцтва храмаў. Дэтальныя каментарыі па многіх агучаных пытаннях прысутныя атрымалі таксама і ад намесніка старшыні Карэліцкага райвыканкама Руслана Абрамчыка.
Завяршыўся візіт Упаўнаважанага па справах рэлігій і нацыянальнасцей наведваннем Свята-Троіцкага храма ў гарадскім пасёлку Мір, дзе клірык прыхода іерэй Фёдар Лукашэвіч і прыхажанін — намеснік дырэктара па выхаваўчай рабоце Мірскага ДМПТК і мастацкі кіраўнік народнага тэатра “Батлейка” Канстанцін Петрыман расказалі ганароваму госцю гісторыю старадаўняй святыні XVI стагоддзя і цудатворнай Пачаеўскай іконы Божай Маці.
Марына КАЗЛОВІЧ
Фота аўтара
