Увеличение надоев и улучшение качества молока. В Кореличском райисполкоме обсудили развитие животноводческой отрасли района

Фінансавы дабрабыт і эканамічная стабільнасць таго ці іншага сельгаспрадпрыемства ў значнай ступені залежаць ад развіцця жывёлагадоўчай галіны гаспадаркі. Высокі ўзровень такіх паказчыкаў, як колькасць і якасць атрыманага малака, сярэднясутачныя і валавыя прывагі буйной рагатай жывёлы, захаванасць маладняку і рост пагалоўя, дазваляюць сельгаспрадпрыемству цвёрда стаяць на нагах і з упэўненасцю глядзець у будучыню.

Якіх вынікаў дасягнула жывёлагадоўчая галіна Карэліччыны ў 2019 годзе? На якія недахопы ў рабоце трэба звярнуць пільную ўвагу кіраўнікам і галоўным спецыялістам гаспадарак раёна? Якіх вынікаў неабходна дасягнуць у 2020 годзе? На гэтыя і іншыя пытанні былі дадзены грунтоўныя адказы падчас правядзення семінара-нарады пад кіраўніцтвам першага намесніка старшыні Гродзенскага аблвыканкама Івана Жука і старшыні Карэліцкага райвыканкама Генадзія Шатуева з удзелам спецыялістаў камітэта сельскай гаспадаркі і харчавання аблвыканкама, кіраўніцтва і спецыялістаў упраўлення сельскай гаспадаркі і харчавання райвыканкама, райветстанцыі, кіраўнікоў і спецыялістаў сельгаспрадпрыемстваў.

— У Карэліцкім раёне назіраецца значная палярнасць у атрыманых за 2019 год асноўных паказчыках работы жывёлагадоўчай галіны, – адзначыў у пачатку сустрэчы Іван Жук. – Калі ў адной гаспадарцы штодзень карова дае 26,4 кг малака, то ў другой – усяго 8,5 кг. Безумоўна, для таго, каб атрымаць першы вынік, неабходна плённа працаваць на працягу многіх гадоў, укараняць аўтаматызаваныя тэхналогіі і не баяцца інавацый. Менавіта так робяць кіраўнік і галоўныя спецыялісты СВК “Свіцязянка-2003”, дзе па выніках мінулага года надоена 9613 кг малака ад кожнай рагулі. Валавая вытворчасць малака склала 17168 тон, альбо 108,2% да ўзроўню мінулага года. Накіроўваць усе гаспадаркі раёна на такія паказчыкі, безумоўна, немэтазгодна. Аднак кожнае з сельгаспрадпрыемстваў Карэліччыны мае дастатковыя рэзервы для росту, якія неабходна імкнуцца выкарыстаць.

Па словах першага намесніка старшыні аблвыканкама, на Карэліччыне дастаткова востра стаіць пытанне зніжэння якасці малочнай сыравіны. Па выніках 2019 года сельгаспрадпрыемствы раёна прадалі на перапрацоўку гатункам “экстра” 34,9% атрыманага малака, вышэйшым – 41,7%, першым – 23,3%.

– Калі на малочнатаварнай ферме не атрымліваюць малако гатункам “экстра”, можна смела гаварыць аб адсутнасць на ёй культуры жывёлагадоўлі, – падкрэсліў Іван Жук. – Дзе шукаць прычыну? Галоўнаму заатэхніку неабходна пераглядзець рацыён жывёлы, ветэрынарнай службе сачыць за здароўем кароў, упраўляючаму фермай – за ўмовамі іх утрымання, а аператары машыннага даення павінны памятаць аб асабістай гігіене. Толькі работа ўсяго калектыву ў сукупнасці зможа палепшыць становішча. Што датычыцца навядзення парадку на ферме, то правесці адзін санітарны дзень у месяц недастаткова. Патрымліваць чысціню штодзённа – толькі так можна дасягнуць станоўчых вынікаў.

Падчас правядзення семінара пытанню якасці малака была нададзена павышаная ўвага зусім невыпадкова. Калі тону сыравіны гатункам “экстра” перапрацоўчыя прадпрыемствы прымалі па кошце 690 рублёў 50 капеек, то за такую ж колькасць малака вышэйшага гатунку плацяць 595 рублёў 3 капейкі. Розніца адчувальная, асабіста напярэдадні пасяўной кампаніі, калі кожнай гаспадарцы неабходны фінансавыя сродкі для падрыхтоўкі землеапрацоўчай і пасяўной тэхнікі, закупкі дастатковай колькасці угнаенняў і паліва для паспяховага правядзення палявых работ.

– Гэтай зімой для жывёлаводаў складаюцца амаль ідэальныя ўмовы, – адзначыў Іван Жук. – Адсутнасць снегу і маразоў толькі спрыяе атрыманню высокіх надояў і прывагаў. Аднак некаторыя гаспадаркі раёна так і не змаглі скарыстацца цёплым надвор’ем, каб падцягнуць паказчыкі.

Аб тым, з якімі паказчыкамі сельгаспрадпрыемствы Карэліччыны завяршылі 2019 год, расказаў намеснік старшыні райвыканкама, начальнік упраўлення сельскай гаспадаркі і харчавання Анатолій Коршун.

– Зразумела, што мы не патрабуем ад кіраўнікоў сельгаспрадпрыемстваў узводзіць новыя фермы ці займацца рэканструкцыяй старых. Тут неабходны вілікія фінансавыя сродкі, – падкрэсліў Анатолій Коршун. – Аднак прывесці ў парадак дакументацыю і сістэматычна запаўняць усе неабходныя журналы, сачыць за тэрмінамі прыдатнасці медыкаментаў і замарожанага малозіва, выконваць элементарныя правілы гігіены — гэта не патрабуе амаль ніякіх выдаткаў. Тут на першы план выходзіць выканальніцкая дысцыпліна спецыялістаў гаспадаркі і работнікаў фермы.

На 2020 год перад жывёлаводамі раёна былі пастаўлены канкрэтныя задачы: сярэднясутачныя прывагі БРЖ не павінны быць ніжэй за 700 грамаў, абавязковае выкананне плану рэалізацыі ялавічыны на перапрацоўчыя прадпрыемствы, павышэнне якасці малака і павелічэнне матачнага пагалоўя, без росту якога перспектывы ў развіцці жывёлагадоўлі быць не можа.

Аксана ЯНУШ
Фота аўтара

✏ Подписывайтесь на телеграм-канал «Гродно Медиа Group» по короткой ссылке @GrodnoMediaGroup.
📢 Телеграм-канал «Гродно Медиа Group» — это ежедневные новости районов Гродненской области и города Гродно.
👥 Телеграм-канал «Гродно Медиа Group», ищите только самые интересные новости по короткой ссылке @GrodnoMediaGroup.