Хлеборобы племзавода «Кореличи» закончили жатву с третьей по району урожайностью — 76,5%
Некаторыя сельгаспрадпрыемствы Карэліччыны завяршылі ўборку зерневых і зернебабовых культур. 100-працэнтнага выніку на жніве ўжо дасягнулі КСУП “Лукі-Агра” і “Цырын-Агра”, СВК “Маяк-Заполле”, КСУП “Племзавод Карэлічы”. Так, племзавод сёння абмалочвае апошнія гектары збажыны.
Сёлетні зерневы клін племзавода выглядае наступным чынам: 145 га адведзена пад азімы трыцікале, 370 га займае азімая пшаніца, 40 га – яравая. Ячмень пасеяны на 145 га, жыта – на 45 га, пад аўсом – 26 га.
– Зрабілі стаўку на азімую пшаніцу, і яна апраўдала надзеі. Атрымалі прыкладна 78 цэнтнераў на круг, – дзеліцца галоўны аграном КСУП “Племзавод Карэлічы” Раман Шэўка. – Хоць кажуць, што поле полю розніца, аднак рэзкіх скачкоў ураджайнасці сёлета не адчувалі. Усе зерневыя культуры паказалі сябе прыкладна аднолькава. Сухое спякотнае надвор’е, зразумела, спрыяла хуткаму ходу жніва. Ды і зерне, якое паступала на зернесушыльны комплекс, не трэба было дасушваць. Аднак ёсць адно але. Усе культуры паспявалі практычна адначасова, і, каб не страціць ніводнага каласка, тэхніка працавала ў полі з ранку да позняга вечара. І канчатковы вынік нас поўнасцю задаволіў: агульны вал збажыны перавышае 5 тысяч тон, сярэдняя ўраджайнасць – 74,4 ц/га, што значна вышэй леташняга выніку. Увогуле, жніво – складаны час, але вельмі прыемны. Гэта залатая пара, калі мы пажынаем плён сваёй працы.
Дырэктар КСУП “Племзавод Карэлічы” Сяргей Брынкевіч адзначае, што ўборка бягучага года прайшла зладжана і размерана, а багаты каравай гаспадаркі надае ўпэўненасці ў заўтрашнім дні. Для атрымання жадаемага ўраджаю, пачынаючы з позняй восені і да фінішнай кропкі — жніва, было зроблена шмат. Нямала фінансавых сродкаў было затрачана, каб паставіць збожжаўборачную тэхніку на лінейку гатоўнасці. Зразумела, падчас падрыхтоўкі камбайнаў нельга ўсё прадбачыць. Да таго ж тэхніка не новая. Таму паломкі падчас жніва былі, аднак інжынерная служба гаспадаркі аператыўна іх выпраўляла.
Збіраючы ўраджай бягучага года, племзавадчане надаюць вялікую ўвагу пасяўной кампаніі, якой зусім хутка будзе дадзены старт. Першым будзе зроблены задзел пад будучы ўраджай азімага рапсу.
– Работа агранома прадугледжвае пастаяннае планіраванне, – адзначае Раман Шэўка. – Калі зараз не паклапаціцца аб будучым ураджаі, можна застацца ні з чым. Таму своечасова ўбіраем салому з палёў, рыхтуем глебу пад сяўбу азімых культур, уносім мінеральныя ўгнаенні. Плануем крыху павялічыць плошчы пад азімыя зерневыя і рапс. Сёлета яны добра паказалі сябе. Таму прыкладзём усе намаганні, каб у наступным годзе мець багатыя засекі і фінансавы дабрабыт.
Аксана ЯНУШ
Фота аўтара