Жители Кореличского района рассказывают, какие газеты и журналы выписывают

Людміла МАНКЕВІЧ,

дырэктар прыватнага гандлёвага ўнітарнага прадпрыемства «Мілацвет»:

— Я пастаянна выпісваю раённую газету «Полымя», у ёй знаходжу цікавыя навіны і рэкламныя звесткі. Да таго ж прапаную і сваю рэкламу. Мяне цікавіць рубрыка «Азбука бяспекі», падабаюцца публікацыі на гістарычныя тэмы. Ёсць пажаданне журналістам: яшчэ больш пісаць аб людзях працы Карэліччыны.

Матулі на Новы год раблю своеасаблівы падарунак — падпіску на часопіс «Советчица». Васьмігадовага ўнука Рому радую часопісамі «3/9 царство» і «Непоседа», каб у яго быў момант чакання новага сябра і ён прывучаўся чытаць.

Алена ЖУЧЭНКА,

ветэран працы, жыхарка райцэнтра:

— Усё жыццё ў нашай сям’і выпісвалі раённую  газету «Полымя». Яна  родная,  пра людзей Карэліцкага краю. На яе старонках змяшчаецца карысная і цікавая інфармацыя.

З задавальненнем чытаю і газету «Аргументы и факты». Выпісваю яе на

паўгода і не шкадую: сапраўды навіны заслугоўваюць увагі і пашыраюць кругагляд. Даўно пасябравала з часопісам «Однако жизнь», у якім знаходжу публікацыі на разнастайныя тэмы.

Чаму выпісваю газеты і часопісы? Гэта нашы сябры, якія дораць цікавыя імгненні сустрэчы з невядомым, даюць магчымасць зазірнуць у мінулае і заўтрашні дзень, напаўняюць наш час карысным заняткам.

Алена МАКАРЧЫК,

бібліёграф ДУК «Карэліцкая раённая бібліятэка», маці дваіх дзяцей:

— Для сваёй пяцігадовай дачкі Верачкі выпісваю дзіцячыя часопісы: «Зайкина школа», «Сказка на ночь», «3/9 царство».  Дзіцячая перыёдыка пазнавальная, захапляючая, цікавая.

Часопісы дапамагаюць дзецям развівацца ўсебакова. Казкі, заданні, рэбусы — гэта патрэбна дзяўчынкам і хлопчыкам у дзіцячым узросце. Да таго ж выданні прыгожа і маляўніча аформлены. Гэта яшчэ больш захапляе дзяцей, і яны цягнуцца да чытання.

Вядучая рубрыкі Галіна СМАЛЯНКА