Обнаружена просрочка. Что показал рейд по продуктовым магазинам агрогородка Жуховичи?

Жухавіцкая зямля славіцца добрымі ўраджаямі і працавітымі  людзьмі, і   тут умеюць ладзіць святы.  А як наладжана гандлёвае абслугоўванне, высвятлялі члены рэйду — журналіст «Полымя» і супрацоўнік Карэліцкага райЦГЭ. Падчас рэйду праверылі захаванне тэрмінаў выкарыстання харчовых прадуктаў.

У прыватным унітарным прадпрыемстве «Гранд Гудвін» звярнулі ўвагу на  ліверную каўбасу «Пяшчотную паштэтную». Як высветлілася, у яе належны тэрмін для ўжывання, а пасля таго, як дасталі з вакуумнай упакоўкі, яна страціла знешні выгляд.  Тэрмін захавання ў вакууме — 12 сутак, пры парушэнні цэласнасці ўпакоўкі прыгодная 72 гадзіны. «Учора з раніцы ўскрыла ўпакоўку, і каўбаса без цэлафана абветрылася», — удакладняе прадавец Кацярына Юшко.

Другі прыклад у гэтай гандлёвай кропцы: каўбаса «Асалода-прэміум» вышэйшага гатунку мела прывабны выгляд, але была пратэрмінаваная. Прадукт выпушчаны 6 сакавіка, захаванасць складае 90 сутак. Як гаворыцца, не ўсё золата, што блішчыць.

На кандытарскую прадукцыю ў гэтым магазіне тэрміны выконваюцца, а малочная прадукцыя рэалізуецца ў адпаведных умовах — захоўваецца ў халадзільным абсталяванні.

У магазіне «Родны кут» Карэліцкага філіяла Гродзенскага аблспажыўтаварыства без маркіроўкі былі цукеркі: «Эксклюзіў» (138 г коштам 18 руб. 54 кап. за 1 кг), «Снегіры» (796 г коштам 15 руб. 31 кап. за 1 кг), «Суфле» (394 г коштам 15 руб. 81 кап. за 1 кг).

У магазіне прыватнага гандлёвага ўнітарнага прадпрыемства «Жухоринко» гутарым з яго дырэктарам Аляксандрам Шадрыным.

— Што карыстаецца попытам?

— Больш за ўсё зараз напіткі і марожанае. Зімой — кансервы, гарбата, кава, каўбаса… Хаця каўбасныя вырабы купляюць круглы год.

— Якім чынам задавольваеце пакупнікоў?

— Наведвальнікі выказваюць пажаданні, і мы імкнёмся іх выканаць. Таму ў магазіне разнастайны асартымент тавараў.

У гэтай гандлёвай кропцы без адпаведнай інфармацыі  быў у продажы арахіс вагой 2 кг 600 г коштам 11 руб. 20 кап. за 1 кг,  прадукт быў зняты з продажу. У халадзільным абсталяванні для каўбасных вырабаў тэрмометр знаходзіўся ў няспраўным стане.

У магазіне «Асарці» прыватнага гандлёвага ўнітарнага прадпрыемства «Регион-Воин-Медиа» г. Баранавічы  адзначаны наступныя парушэнні: крабавыя палачкі ляжалі ў адной халадзільнай камеры з пяльменямі; была парушана цэласнасць упаковак з курынымі паўфабрыкатамі; без інфармацыі захоўваўся шашлык вагой 1 кг.

За 6 месяцаў 2022 года дзяржаўнай установай «Карэліцкі раённы цэнтр гігіены і эпідэміялогіі» праведзена 97 абследаванняў гандлёвых аб’ектаў. У 84 выпадках выяўлены парушэнні санітарна-эпідэміялагічных патрабанняў.

Па выніках маніторынгаў у адрас суб’ектаў гаспадарання накіраваны 73 рэкамендацыі па ўхіленні выяўленых парушэнняў (недахопаў). Вынесены 22 прадпісанні аб зняцці з абароту прадукцыі агульнай вагой 78,872 кг і 24,02 л. Прыцягнуты да адміністратыўнай адказнасці         4 юрыдычныя  і 11 фізічных асоб.

Галіна СМАЛЯНКА

Фота прадастаўлена Карэліцкім райЦГЭ