У Карэлічах з 1 верасня закрылі будаўнічы ліцэй. Што чакае працоўны і вучнёўскі калектывы?
З першага верасня бягучага года закрылася УА «Карэліцкі дзяржаўны будаўнічы прафесійны ліцэй». Будаўнічы ліцэй у Карэлічах рыхтаваў маляроў, муляроў-мантажнікаў, цесляроў, машыністаў кранаў і зваршчыкаў.
Адной з прычын закрыцця ўстановы адукацыі называюць сур’ёзны недахоп навучэнцаў. За каментарыямі звярнуліся да былога дырэктара ліцэя Генадзія Арцюха.
– Аптымізацыя сеткі ўстаноў адукацыі тычыцца не толькі нашага раёна, але і ў цэлым рэспублікі, – зазначае Генадзій Мікалаевіч. – У гэтага працэсу ёсць сур’ёзныя перадумовы. Эканамічны эфект – не галоўная прычына, хоць і яе неабходна ўлічваць. Памяншаецца колькасць вучняў ва ўстановах адукацыі – памяншаецца колькасць жадаючых навучацца ў ліцэях. Напрыклад, у мінулым годзе набралі толькі 24 першакурснікі.
Падкрэслю, што пры закрыцці ўстановы адукацыі разглядаліся варыянты працаўладкавання не толькі педагогаў, але і тэхперсаналу. Усім педагогам была прапанавана работа па профілі ва ўстановах адукацыі раёна, некаторыя працягваюць прафесійную дзейнасць у Навагрудскім дзяржаўным сельскагаспадарчым прафесійным ліцэі. Абслугоўваючы персанал таксама працаўладкаваны ва ўстановы адукацыі і культуры раёна.
Усе навучэнцы пераведзены і працягваюць адукацыю па абраным імі профілі ў Навагрудскім дзяржаўным сельскагаспадарчым прафесійным ліцэі з прадастаўленнем пакояў у інтэрнатах. Спецыяльнасць “Электрагазазваршчык. Вадзіцель аўтамабіля катэгорыі “С”. Машыніст крана”, якая была запатрабавана сярод паступаючых, засталася. Таму ўсе жадаючыя мелі магчымасць падаць дакументы і набыць вышэй названую спецыяльнасць.
Што датычыцца будынкаў установы адукацыі, то зараз разглядаюцца варыянты ўключэння іх у гаспадарчы абарот.
Газета “Полымя” будзе цікавіцца далейшым лёсам будынкаў і інфармаваць свайго чытача.
Кацярына КУКАНАВА