4 снежня — Дзень юрыста. Аб рабоце і асаблівасцях сучаснай юрыспрудэнцыі расказвае юрысконсульт СВК “Свіцязянка-2003” Алена Гірза
Юрыст – агульная назва прафесіі, якая аб’ядноўвае ўсіх служыцеляў закона. Адвакат, пракурор, натарыус, юрысконсульт, працоўны або падатковы інспектар – усё гэта юрысты адпаведных спецыяльнасцей, кожная з якіх звязана з пэўнай галіной права. Граматны, высокакваліфікаваны юрыст – гэта жаданы работнік, дарадца ў любой галіне прафесійнай дзейнасці. Напярэдадні прафесійнага свята аб рабоце і асаблівасцях сучаснай юрыспрудэнцыі расказала юрысконсульт СВК “Свіцязянка-2003” Алена Гірза.
Малады юрысконсульт з СВК “Свіцязянка-2003” Алена Іванаўна Гірза родам з вёскі Міратычы, што знаходзіцца на тэрыторыі гаспадаркі. Да свайго першага месца працы прыступіла ў 2013 годзе пасля заканчэння ДУА “Баранавіцкі эканоміка-юрыдычны каледж”. У гэтым жа годзе паступіла на завочнае аддзяленне Гродзенскага дзяржуніверсітэта імя Я. Купалы. У 2017 годзе атрымала дыплом з кваліфікацыяй юрыст з веданнем эканомікі. Дзяўчыне даводзілася сумяшчаць работу з вучобай, задача была складаная, але нягледзячы на цяжкасці, яна дасягнула пастаўленай мэты. Да выбару будучай прафесіі заўсёды ставілася вельмі сур’ёзна, бо лічыць, што прафесія павінна стаць справай усяго жыцця.
– На рабоце чалавек праводзіць большую частку часу, і важна, – як лічыць Алена Іванаўна, – каб тое, чым займаешся, прыносіла задавальненне. А яшчэ лепш, калі абраная прафесія будзе карысная не толькі самому чалавеку, але і людзям.
– Алена Іванаўна, што для Вас было самым складаным, калі прыступілі да працы?
– Безумоўна, першы год работы на пасадзе юрысконсульта СВК “Свіцязянка-2003” быў самым складаным. Кожны ведае, што тэорыя – гэта адно, а практыка – зусім іншае. Памятаю першыя працоўныя дні. Яны былі вельмі хвалюючымі, я вельмі перажывала, што мне даручаць якую-небудзь справу, а я не спраўлюся, або зададуць пытанне, а я не змагу адразу даць на яго адказ. Лічу, што мне вельмі пашчасціла ў жыцці, бо прыступіла да працы ў гаспадарцы ў той час, калі кіраўніком быў Уладзімір Арсенцьевіч Галавач. Гэта быў высокаадукаваны чалавек, які ўвесь час развіваўся, а дзякуючы яму, развівалася і я. Ён заўсёды ставіў новыя мэты і прыкладаў усе намаганні для іх дасягнення. Памятаю, з’явілася электронная гандлёвая пляцоўка, а нам трэба было закупіць рабатызаваныя даільныя ўстаноўкі. Як закупіць і як аформіць, ніхто не ведаў, і спытаць не было ў каго, бо гэта было нешта новае і нікім яшчэ нязведанае. Праз электронную гандлёвую пляцоўку нам удалося гэта зрабіць.
– Чым Вас прыцягвае абраная прафесія?
– Юрысконсульт – гэта ў першую чаргу самастойная праца і абавязкова самаадукацыя. Ні адзін выкладчык не навучыць цалкам прафесіі. Кожны дзень ты сутыкаешся з новымі задачамі, якія табе неабходна самастойна вырашаць, а гэта і ёсць самаразвіццё. Атрыманыя веды дапамагаюць не толькі на рабоце, але і ў жыцці, гэта, напэўна, і прыцягвае. Прыемна адчуваць сябе упэўненай, бо заўсёды можаш сам за сябе пастаяць.
– У чым заключаецца Ваша работа? Якія прававыя задачы Вы вырашаеце ў якасці юрыста менавіта ў гаспадарцы?
— Работа ў юрысконсульта разнапланавая, аб’ёмная, шматгранная і ўключае шэраг накірункаў, сярод якіх заканадаўчае суправаджэнне дзейнасці гаспадаркі, заключэнне шматлікіх дагавораў па куплі-продажы і на аказанне паслуг, тэндэраў, мытнае афармленне тавараў, напрыклад, насення, набытага за мяжой, аказанне работнікам гаспадаркі дапамогі пры пошуку неабходных нарматыўных прававых актаў і іншае.
– Што з’яўляецца самым складаным у Вашай прафесіі?
– Зразумела, у кожнай спецыяльнасці ёсць свае нюансы і асаблівасці. Гэта датычыцца і юрыдычнай дзейнасці. Справа ў тым, што ў заканадаўчых дакументах часта адбываюцца змены, за якімі трэба пастаянна сачыць, трымаючы руку на пульсе часу. Аднак сёння гэта лёгка рабіць дзякуючы прававым базам у інтэрнэце. Трэба толькі мець жаданне і працаваць над сабой.
– Ці можна сказаць, што юрыст – адзін з галоўных памочнікаў кіраўніка прадпрыемства?
– Безумоўна. У сучасных умовах неабходны веды нарматыўных прававых актаў, якія рэгламентуюць гаспадарчую і фінансавую дзейнасць прадпрыемстваў. Таму кіраўнік гаспадаркі Аляксандр Аляксандравіч Мяцеліца нярэдка кансультуецца па самых розных юрыдычных пытаннях.
– Якімі якасцямі павінен валодаць чалавек, каб атрымаць поспех у юрыспрудэнцыі, у кар’ерным росце?
– Той, хто прысвяціў сябе юрыспрудэнцыі, павінен імкнуцца да самаадукацыі, валодаць уменнем працаваць з вялікімі аб’ёмамі матэрыялаў, паколькі заканадаўства змяняецца, быць гатовым хутка засвойваць новую інфармацыю. Не менш важныя ў нашай прафесіі чалавечыя якасці, такія як дабрыня, спагадлівасць, справядлівасць, павага. Мой дэвіз – “Добры юрыст – гэта не той, хто ведае на памяць усе законы, а той, хто ведае, дзе іх знайсці і правільна прымяніць”.
– Чым захапляецеся, як бавіце вольны ад працы час?
– Нейкага пэўнага хобі ў мяне няма. Увесь свой вольны час я аддаю сям’і, якая для мяне заўсёды надзея і апора. Я замужам. Муж Аляксандр працуе ў Карэліцкім РУП ЖКГ на трактары, жывём у інтэрнаце ў райцэнтры. Выхоўваем сына Мацвея. Ён вельмі дапытлівы і яму трэба ўсё расказаць: што, як і чаму.
Кацярына КУКАНАВА
Фота аўтара
