Першы ў райцэнтры, трэці ў сям’і. Урачыстая рэгістрацыя нараджэння дзіцяці адбылася ў аддзеле ЗАГС Карэліцкага райвыканкама

20 студзеня ў  аддзеле  ЗАГС  Карэліцкага райвыканкама адбылася ўрачыстая рэгістрацыя першага   жыхара г.п. Карэлічы, які  нарадзіўся ў сям’і  Андрэя і Ірыны Худніцкіх.  Маленькі Аляксандр з’явіўся на свет  12 студзеня.

Няма мацней на зямлі саюза, чым шчаслівая і дружная сям’я. Гэта і пачатак новага жыцця, і працяг прыгожага роду. Сям’я  –   найвышэйшае шчасце, якое можа стварыць чалавек сам.   Калі ў ёй нараджаюцца дзеці  –  гэта шчасце ўдвая. З’яўленне чалавека –  сапраўдны цуд, які ніколі не састарэе.  Кожны раз нараджаецца не проста новы чалавек, нараджаецца новы дзіўны свет, непаўторны і ўнікальны. Гэтай важнай  падзеі  ў біяграфіі сям’і і дэмаграфічнай статыстыцы раёна   надаецца вялікая ўвага.

Маленькі Аляксандр  –   трэці сынок у сям’і. Старэйшаму  Яўгенію – 13 гадоў, сярэдняму Максіму – 9. Бацькі, Андрэй і Ірына Худніцкія, разам ужо  чатырнаццаць гадоў.

Андрэй Анатольевіч працуе майстрам брыгады па рамонце вонкавага асвятлення Карэліцкага РЭС, Ірына Міхайлаўна да дэкрэтнага водпуску працавала ў ДУ «Цэнтр для забеспячэння дзейнасці бюджэтных і іншых арганізацый Карэліцкага раёна».

Падчас урачыстай цырымоніі начальнік аддзела загс райвыканкама Валянціна Сіўко, звярнуўшыся да бацькоў,  сказала:

– Шчаслівая сям’я – гэта залог аднаго з важнейшых перыядаў чалавечага жыцця  – дзяцінства.  І ад таго, як яно прайшло, што  ўвайшло ў розум і сэрца дзіцяці  з навакольнага свету,  у вырашальнай ступені залежыць, якім чалавекам вырасце  немаўля. Быць бацькамі няпроста, а шматдзетнымі яшчэ складаней. Але вы не палохайцеся цяжкасцяў, аддавайце    дзеткам ласку і цеплыню,  і тады яны  будуць адчуваць сябе  любімымі,  лепшымі, жаданымі. Чалавек закліканы жыць так,  каб у яго розуме панавала праўда, у яго пачуццях –  прыгажосць, у волі – дабрыня , а ва ўсім –  боская гармонія і каханне. Хай менавіта такім чалавекам стане нованароджаны  жыхар г.п. Карэлічы Аляксандр.

Радасную падзею  прыйшлі падзяліць прадстаўнікі працоўнага калектыву, дзе працуе мама Ірына Міхайлаўна, і прадстаўнік Карэліцкай раённай арганізацыі  РГА “Беларускі саюз жанчын” Наталля Адамцэвіч, якая ўручыла грашовыя сертыфікаты ад гэтай грамадскай арганізацыі  і ад грамадскага аб’яднання “Белая Русь”.

У сваю чаргу Андрэй і Ірына Худніцкія  падзякавалі  ўсім,  хто павіншаваў з нараджэннем сыночка,  і пажадалі   жыхарам Карэліччыны здароўя, шчасця і любові.

Кацярына КУКАНАВА

Фота аўтара