Представители российского туристического бизнеса посетили Кореличский район

Першым прыпынкам на Карэліччыне стала аграэкасядзіба “Белыя Лугі”.

— Сардэчна запрашаем вас у “Белыя Лугі”, — вітала гасцей хлебам-соллю добразычлівая гаспадыня і запрашала ў хату.

Прадстаўнікі турфірм змаглі прагуляцца па вёсцы, азнаёміцца з умовамі пражывання у сялянскіх хатках і ацаніць якасць паслуг, якія аказваюць гаспадары сядзібы. Для наведвальнікаў прадстаўлены дзесяць сялянскіх хатак, 37 месцаў для пражывання ў вёсцы. Для гасцей сядзібы працуе карчма і сапраўдная лазня на дровах. У ваколіцах вёскі ёсць магчымасць павудзіць рыбу, пакатацца на лодцы, раварах, санях, лыжах, пагушкацца на арэлях, пагуляць у гольф. Калі наведвальнік хоча паспрабаваць сябе ў сельскай працы, ён можа пасекчы дровы, пакасіць траву, пасадзіць агарод, прынесці вады з калодзежа, пакарміць хатніх жывёл, сярод якіх свінні, авечкі, куры, гусі, трусы.

Наступны прыпынак — Мірскі замак, які сёння выконвае функцыі сапраўднага турыстычнага комплексу, на яго тэрыторыі знаходзяцца рэстаран і гасцініца. Сустракалі гасцей намеснік старшыні Карэліцкага  райвыканкама Яўген Чычкан, дырэктар замкавага комплексу  “Мір” Аляксандр Лойка, а таксама музыкі народнага ансамбля песні “Забава”, якія парадавалі турыстаў народнай песняй.

Падчас экскурсіі госці пацікавіліся, чаму пасёлак носіць такую назву.

— У пасёлку, дзе жылі прадстаўнікі многіх канфесій і нацыянальнасцей, ніколі не было пагромаў і міжусобіц, — сказаў Аляксандр Лойка. — Жыхары пасёлка заўжды жылі ў міры і згодзе. Ёсць версія  паходжання назвы ад слова “эмір”, так называўся начальнік ваяроў-татараў, што размяшчаліся тут.

Завіталі госці і ў гасцініцу, дзе ім прадэманстравалі ўмовы, якія прапануе “Мірскі замак” для сваіх наведвальнікаў. У гасцініцы 16 нумароў, у якіх можа адначасова адпачыць 31 чалавек.

Госці азнаёміліся з экспазіцыяй замка і змаглі патанчыць на сапраўдным сярэднявечным балі.

— У склад турыстычнага кластара Санкт-Пецярбурга і Паўночна-Заходняй федэральнай акругі ўваходзяць больш за сто кампаній, — расказвае кіраўнік кластара Лілія Сарокіна. — У супрацоўніцтве з упраўленнем спорту і турызму Гродзенскага аблвыканкама мы прывезлі ў Гродзенскую вобласць прадстаўнікоў 30 тураператараў.

— У Беларусі я ўпершыню, пры гэтым я, як прадстаўнік турыстычнай кампаніі, ужо адпраўляла турыстаў у вашу краіну на санаторна-курортнае лячэнне, — кажа кіраўнік па сувязях з грамадскасцю турыстычнага кластара Санкт-Пецярбурга і Паўночна-Заходняй федэральнай акругі Святлана Галер. — Безумоўна, мне было цікава паглядзець беларускія санаторыі, каб мець асабістае ўяўленне і разуменне. Заўжды важна данесці да кліента інфармацыю асабіста. Гродзенская вобласць прыемна здзівіла. Я ўбачыла шмат магчымасцей для разнапланавых праграм, разлічаных на розныя катэгорыі кліентаў. Па-першае, паколькі гэта шматканфесіянальны край, тут цікавы культурна-рэлігійны турызм. Мы наведалі Каложскую царкву ХІІ стагоддзя, дзе я ўбачыла даволі рэдкую ікону, якая вельмі ўразіла. Па-другое, зараз і ў Расіі, і ў свеце актыўна развіваецца прамысловы турызм, і мне было цікава, як гэта працуе ў вас. Мы наведалі ААТ “Лідскае піва” і шклозавод “Нёман”. Магу сказаць, што ўражанні выдатныя. Усё добра арганізавана, экскурсіі сапраўды цікавыя. Вельмі выдатны музей на шклозаводзе. Мы ўбачылі, якая гэта няпростая праца, — зрабіць звычайную шклянку ці вазу, тым больш, што гэта ручная работа. Гэта павышае каштоўнасць набытых сувеніраў, якія застануцца на памяць аб наведванні. Акрамя гэтага, тут выдатныя магчымасці для экатурызму. Я вырашыла, што абавязкова прыеду гуляць па экалагічных сцежках. Прырода тут неверагодная. Было цікава даведацца аб экалагічных сядзібах, бо гэта заўжды асабістыя ўкладанні, гэта захаванне гістарычнай спадчыны. У Расіі гэта таксама развіваецца, але мне спадабаўся ваш вопыт. Сядзіба “Белыя Лугі” — гэта ўнікальны праект, бо, калі пераносяцца і захоўваюцца старыя хаты, калі аднаўляецца побыт — гэта сапраўды захапляе. Вельмі цікава паглядзець, як жылі сяляне, гэта сапраўдная культурная спадчына, якая жыве ў нашай крыві. Але тое, што там яшчэ можна і пажыць — гэта вельмі цікавы вопыт, магчымасць адпачыць душой, змяніць лад жыцця, абстаноўку. Мы ўбачылі, што гэта ў вас развіта на даволі высокім узроўні.

— Усё цудоўна, — дзеліцца ўражаннем прадстаўнік тураператара “Валхва” з Вялікага Ноўгарада Алеся Жыльцова. — Рэкламны тур праходзіць на вышэйшым узроўні. Нас усюды выдатна сустракаюць: на пунктах харчавання, на эскурсійных аб’ектах, у гасцініцах. Выдатны Мірскі замак. Я лічу, што гэта адзін з самых фешэнебельных замкаў Беларусі, таму ў ім вельмі прыемна знаходзіцца.

— Не думала, што ў вас так прыгожа, што мы ўбачым столькі прыгожых і цікавых месцаў, — расказвае прадстаўнік турагенцтва “Штыль” з Санкт-Пецярбурга Галіна Зоцікава. — Усё вельмі разнастайна. Мы шмат што можам прапанаваць турыстам. У вас ёсць на што паглядзець, і людзі, якія працуюць, да ўсяго падыходзяць з душой. Адчуваеш, што яны любяць сваю працу, адданыя ёй. Усё вельмі цёпла і гасцінна.

Святлана Галер упэўнена, што дзякуючы арганізаванаму інфармацыйнаму візіту, супрацоўніцтву турыстычнага кластара і ўпраўлення спорту і турызму Гродзенскага аблвыканкама паток турыстаў, якія захочуць прыехаць на Гродзеншчыну, павялічыцца. Дапаможа ў гэтым і тое, што зараз выпрацоўваецца магчымасць арганізацыі турыстычных цягнікоў Гродна — Санкт-Пецярбург і Гродна — Масква.

— Мы заўсёды любілі Беларусь і прапаноўвалі падарожнічаць па ёй  сваім кліентам, але асабістае знаёмства, супрацоўніцтва кластара і ўпраўлення спорту і турызму Гродзенскага аблвыканкама даюць вялікія магчымасці для нашай сумеснай працы. Мы заўсёды былі вельмі блізкімі, а цяпер будзем яшчэ бліжэй, — лічыць Святлана Галер.

Рэкламны тур для прадстаўнікоў расійскага турыстычнага бізнесу завяршыўся падпісаннем мемарандума аб супрацоўніцтве паміж упраўленнем спорту і турызму Гродзенскага аблвыканкама і турыстычным кластарам Санкт-Пецярбурга і Паўночна-Заходняй федэральнай акругі. Цырымонія прайшла ў абласным перынатальным цэнтры, які дэлегацыя наведала ў завяршэнне шасцідзённага мерапрыемства.

 

Сяргей СТОЛЯР

Фота аўтара