У Карэлічах адбылося выніковае пасяджэнне ідэалагічнай вертыкалі раёна і сродкаў масавай інфармацыі за 2022 год

18.03.2023 509 Админ

У Карэліцкім маладзёжным цэнтры культуры адбылося выніковае пасяджэнне ідэалагічнай вертыкалі раёна і сродкаў масавай інфармацыі за 2022 год і вызначаны прыярытэтныя накірункі работы на 2023 год.

Паспяховая рэалізацыя дзяржаўнай палітыкі шмат у чым залежыць ад узроўню пастаноўкі ідэалагічнай работы. Цэласнасць, сістэма і паслядоўнасць гэтай працы павінны быць забяспечаны ва ўсіх сферах дзейнасці. У нарадзе прынялі ўдзел намеснікі кіраўнікоў устаноў агульнай сярэдняй адукацыі па выхаваўчай і вучэбна-выхаваўчай рабоце, намеснікі кіраўнікоў па ідэалагічнай рабоце ў калектывах, лідары грамадскіх аб’яднанняў.

Аб выніках работы аддзела ідэалагічнай работы, культуры і па справах моладзі Карэліцкага райвыканкама за 2022 год расказала начальнік аддзела ідэалагічнай работы, культуры і па справах моладзі Карэліцкага райвыканкама Нэлі Маісеенка.

– На працягу года дзейнасць ідэалагічнай вертыкалі ажыццяўлялася на планавай аснове і будавалася ў адпаведнасці з планам работы аддзела ідэалагічнай работы, культуры і па справах моладзі райвыканкама і крытэрыяў эфектыўнасці ідэалагічнай работы, якія ўключаюць правядзенне дзён інфармавання, арганізацыю спаборніцтваў за дасягненне вытворчых паказчыкаў, інфармацыйную дзейнасць, працу грамадскіх аб’яднанняў і арганізацый, – адзначыла Нэлі Аляксандраўна. – Работа будавалася ў рамках Года гістарычнай памяці з улікам асноўных агульнадзяржаўных мерапрыемстваў. У цэнтры ўвагі аказаліся інфармацыйна-растлумачальная работа, у тым ліку практыка правядзення адзіных дзён інфармавання насельніцтва, увекавечванне памяці абаронцаў Айчыны і ахвяр войнаў, звароты грамадзян, дзейнасць грамадскіх аб’яднанняў, работа з моладдзю, знакавыя мерапрыемствы мінулага года, анансаванне работы ў інтэрнэт-прасторы.

Сярод задач, якія ставяць перад сабой ідэолагі на 2023 год, — працяг практыкі правядзення сустрэч кіраўніцтва раёна з насельніцтвам па месцы жыхарства і ў арганізацыях, дыялогавых пляцовак з павелічэннем ахопу розных катэгорый удзельнікаў. Пільная ўвага будзе надавацца актуальным пытанням, якія хвалююць насельніцтва. Адным з прыярытэтных напрамкаў пры рэалізацыі дзяржаўнай моладзевай палітыкі застаецца грамадзянскае і патрыятычнае выхаванне.

Слова трымалі і ўдзельнікі мерапрыемства. Аб сістэме і арганізацыі інфармацыйнай і ідэалагічнай работы ў калектывах расказалі адказны за ідэалагічную работу ААТ “Карэлічы-Лён” Наталля Дасько і намеснік дырэктара па выхаваўчай рабоце ДУА ”Сярэдняя школа імя Г. І. Сташэўскай г.п. Мір” Наталля Квач. У сваіх прамовах выступаючыя яскрава акрэслілі ролю ідэалагічнай работы ў калектывах. Спецыялісты імкнуцца данесці да свядомасці кожнага чалавека прыярытэты дзяржаўнай палітыкі, матываваць яго на вынік працы і правільныя рашэнні, а сёння гэта асноўная задача ўсяго ідэалагічнага актыву.

Намеснік дырэктара па ідэалагічнай рабоце КСУП “Малюшычы” Святлана Казак спынілася на пытанні арганізацыі работы з моладдзю.

– Моладзь на прадпрыемстве – гэта сіла, за якой будучае. Рэалізацыя моладзевай палітыкі на прадпрыемстве заключаецца ў забеспячэнні паўнавартаснага прававога і сацыяльнага статусу маладых спецыялістаў, стварэнні прававых, арганізацыйных, эканамічных умоў і гарантый для самарэалізацыі маладога чалавека, садзейнічанні моладзевых ініцыятыў, – адзначыла Святлана Вітальеўна.

Безумоўна, важную ролю ў фарміраванні сучаснай грамадзянскай супольнасці выконваюць грамадскія аб’яднанні. Актыўны ўдзел у грамадска-палітычным жыцці раёна прымаюць і члены Беларускага грамадскага аб’яднання ветэранаў. Актывісты арганізацыі праводзяць значную работу па захаванні гістарычнай памяці аб Вялікай Айчыннай вайне, удзельнічаюць у патрыятычным выхаванні моладзі, аказваюць дапамогу ветэранам працы, вязням. Пра гэта расказала ўдзельнікам пасяджэння лідар Беларускага грамадскага аб’яднання ветэранаў Карэліцкага раёна Валянціна Кошур.

Да прысутных звярнулася першы сакратар Карэліцкага раённага камітэта ГА ”БРСМ” Аксіння Ждан, якая дала ацэнку рабоце пярвічных арганізацый раёна і выказала пажаданне аб актывізацыі работы пярвічак на базе сельгаспрадпрыемстваў. Выступаючая акцэнтавала ўвагу прысутных і на арганізацыі работы студатрадаў падчас летняга адпачынку моладзі.

На пасяджэнні прысутнічаў і падзяліўся меркаваннямі намеснік старшыні Карэліцкага райвыканкама, старшыня РА РГА ”Белая Русь” Яўген Чычкан, які адзначыў, што для таго, каб ідэалагічная праца мела належны эфект, неабходна ўвесь час удасканальваць яе сістэму.

Па традыцыі, адным з прыемных момантаў нарады стала цырымонія ўзнагароджання лепшых спецыялістаў па арганізацыі ідэалагічнай работы прадпрыемстваў і арганізацый раёна, прадстаўнікоў грамадскіх арганізацый.

Ганаровай граматай Галоўнага ўпраўлення ідэалагічнай работы і па справах моладзі Гродзенскага аблвыканкама ўзнагароджана першы сакратар Карэліцкай раённай арганізацыі Камуністычнай партыі Беларусі Марыя Беленава.

Ганаровай граматай Карэліцкага раённага Савета дэпутатаў узнагароджана майстар паглыбленага цэха перапрацоўкі ААТ “Карэлічы-Лён” Наталля Дасько.

Граматамі аддзела ідэалагічнай работы, культуры і па справах моладзі Карэліцкага райвыканкама ўзнагароджаны калектыў ДУА ”Сярэдняя школа г.п. Мір імя Г. І. Сташэўскай”.

Падзячнымі пісьмамі аддзела ідэалагічнай работы, культуры і па справах моладзі Карэліцкага райвыканкама ўзнагароджаны начальнік Карэліцкага сырцэха “Навагрудскія Дары” філіяла ААТ “Лідскі малочна-кансервавы камбінат” Ларыса Рапавец, адказны за ідэалагічную работу Карэліцкага УКП бытавога абслугоўвання насельніцтва Іна Вайцешак, намеснік дырэктара па ідэалагічнай рабоце КСУП “Малюшычы” Святлана Казак.