Рапс – асноўная аптымальная з пункту гледжання ўраджайнасці ў кліматычных умовах Беларусі алейная культура. Вялікае значэнне культуры для сельскай гаспадаркі разумеюць і аграрыі Карэліччыны. Ужо ў канцы ліпеня гаспадаркі раёна прыступілі да сяўбы азімага рапсу.
Карэспандэнт раённай газеты “Полымя” накіравалася ў СВК “Свіцязянка-2003”. Галоўны аграном сельгаспрадпрыемства Дзмітрый Волк расказаў:
– Да задзелу рапсавага кліну прыступілі 25 ліпеня. Да 15 жніўня плануецца завяршыць яго сяўбу. Сёлета ў гаспадарцы пад культуру адведзена 600 га: 200 га будзе засеяна класічным спосабам, а 400 – выкарыстоўваючы тэхналогію Strip-till, якая ўжо даказала мясцовым аграрыям сваю эфектыўнасць.
Падрыхтоўка глебы не менш важная, чым сама сяўба. Ад якасці выкананай работы залежыць развіццё ўсходаў, а значыць, і будучы ўраджай. Пасля ўборкі папярэдніка, ім была азімая пшаніца, у глебу былі ўнесены гліфасат і калійныя ўгнаенні. Для дружных усходаў і ў будучым добрага ўраджаю насенне павінна легчы ў добрую глебу.
– Рапс пачалі сеяць рана. А калі зіма будзе позняя, ён не перарасце?
– Гэтага не адбудзецца. Каб знізіць рызыку перарастання, апрацоўваем пасевы регулятарамі росту. Прэпарат запавольвае, а не спыняе рост раслін, стымулюе назапашванне пажыўных рэчываў у каранёвай сістэме, тым самым актывізуючы яе развіццё. Мы добра разумеем, што рапс неабходна пасеяць у аптымальныя тэрміны, належным чынам наладжваць пасяўныя агрэгаты, каб не дапусціць загушчаных пасеваў.
Пакуль мы размаўляем, гул трактара ўзмацняецца. Глебаапрацоўчы пасяўны агрэгат Mzuri 6Т выконвае некалькі функцый: рыхтуе глебу пад сяўбу, апускае ў зямлю насенне і адразу ж уносіць у радкі комплексныя ўгнаенні. Такі комплексны падыход да справы дазваляе аграрыям эканоміць угнаенні, грашовыя сродкі і час, якога ў гарачыя ўборачныя дні так не хапае.
Параўняўшыся з намі, літаральна на некалькі хвілін пакідае свой “Джон-Дзір” механізатар Дзмітрый Сіроцін. Перакінуліся некалькімі словамі. У сельскай гаспадарцы ён працуе больш за дваццаць гадоў. Да сялянскіх будняў яму не прывыкаць. Любая справа, за якую ні возьмецца, спорыцца ў яго руках. І сее ён таксама на сумленне – радочкі нібы пад лінейку.
– Інакш і нельга! – усміхаецца механізатар. – Які зачын пад будучы ўраджай зробіш, такія ўсходы і атрымаеш. Калі калегі будуць “чорнае золата” жаць, хочацца, каб мяне добрым словам успаміналі.
У раёне пад сяўбу азімага рапсу ўзарана 3050 га, пасеяна 2419 га, што складае 60% ад плана. СВК «Свіцязянка-2003» першым у раёне завяршыў сяўбу чорнага золата.
Кацярына КУКАНАВА
Фота аўтара
