Ранні пачатак пасяўной, якая стартавала на Карэліччыне ў пачатку сакавіка, даў магчымасць аграрыям без аўралаў праводзіць якасную кампанію, укладваючыся ў аптымальныя агратэхнічныя тэрміны. Хвалі цяпла мінімум двойчы змяняліся рэзкімі пахаладаннямі, але нягледзячы на гэта сёлетнюю вясну нельга назваць шчодрай на ападкі. Перыядычна яны выпадаюць, але на ўзровень грунтовых водаў істотна не ўплываюць. Ды і верхні пласт глебы пад цёплым красавіцкім сонцам высыхае вельмі хутка.
У такіх умовах на Карэліччыне завяршылі сяўбу ранніх яравых зерневых і зернебабовых культур яшчэ ў сакавіку і пачалі высяваць цукровыя буракі. Пад іх у раёне адведзена 4063 га.
Дапамагаюць суседзям
У КСВУП “Птушкафабрыка “Чырвонаармейская” сяўба буракоў ідзе ўжо чацвёрты дзень. Засеяць неабходна 350 га. Аграрыі імкнуцца выкарыстаць кожны дзень цёплага надвор’я. Едучы па дарозе Мір-Жухавічы, заўважаем на полі клубы пылу. Тут шчыруе тэхніка з розных сельгаспрадпрыемстваў Карэліччыны, дапамагае работнікам птушкафабрыкі засеяць палеткі. За дзень атрымліваецца апрацаваць больш за 80 га.
— Цукровыя буракі — культура, якая любіць вільгаць, таму спадзяёмся, што надвор’е будзе нам спрыяць, — кажа галоўны аграном птушкафабрыкі Аляксандр Русецкі. — Зразумела, не забываемся пра агратэхнічныя мерапрыемствы, каб восенню атрымаць добры ўраджай. У мінулым годзе ўраджайнасць была каля 400 ц/га.
Знаёмімся з Мікалаем Карпейчыкам, які прыехаў сюды з СВК “Свіцязянка-2003”. Мужчына шчыруе механізатарам больш за 20 гадоў. За дзень паспявае апрацаваць 35 га.
— Галоўнае, каб тэхніка не падводзіла, — кажа мужчына. — А са сваёй задачай справімся!
Насупраць спыняецца трактар Дзмітрыя Лапшы з суседняга СВК “Жухавічы”.
— Здаецца, толькі ўчора вы прыязджалі да нас у Жухавічы на сяўбу цукровых буракоў, — кажа мужчына з усмешкай. — А ўжо прайшоў цэлы год.
Мужчына працуе ў сельскай гаспадарцы больш за 15 гадоў, паспявае засеяць 25-30 га ў дзень. Усё залежыць ад поля.
— Мы заўжды гатовы прыйсці на дапамогу, калі гэта патрэбна. Няважна, дзе працаваць, галоўнае — выканаць усё якасна.
Крыху далей спыняем трактар Уладзіміра Бялевіча з ДП “Малюшычы”.
— На зямлі павінен быць парадак, — упэўнены мужчына. — Таму стараемся агульнымі намаганнямі зрабіць так, каб на палетках вырас добры ўраджай.
Сеюць па тэхналогіі
Тэхналогія апрацоўкі глебы strip-till паступова прыжываецца на карэліцкіх палях. Падчас яе няма звыклага адвальнага ўзворвання з пераваротам пласта глебы. А глебаапрацоўчы апарат, які выкарыстоўваецца пры рабоце, выконвае некалькі задач адначасова: рыхтуе глебу пад сяўбу, уносіць комплекснае ўгнаенне, апускае насенне і ўтрамбоўвае рады.
Менавіта па гэтай тэхналогіі высяваюць кукурузу ў СВК “Жухавічы”, куды мы завіталі па дарозе з поля птушкафабрыкі.
— Strip-till дазваляе выконваць некалькі задач за адзін праход, — тлумачыць галоўны аграном сельгаскааператыва Андрэй Бараноўскі. — А гэта эканомія і грашовых сродкаў, і часу. Да таго ж, тэхналогія дапамагае захоўваць вільгаць у глебе, што вельмі важна, калі надвор’е не цешыць нас ападкамі.
Пакуль мне тлумачаць тонкасці тэхналогіі, да мяжы поля пад’язджае энерганасычаны трактар “РОСТСЕЛЬМАШ”, за рулём якога Дзмітрый Сяляўка. Агрэгат HORSCH Focus TD, які выкарыстоўваецца пры сяўбе па моднай тэхналогіі, пацягне за сабой не кожны трактар.
— Звярніце ўвагу, тут у пэўным парадку размешчаны розныя працоўныя органы. У выніку адбываецца ўзворванне, дыскаванне глебы, унясенне ўгнаенняў, пасеў. Кожную раніцу мне неабходна прывесці абсталяванне ў працоўнае становішча, прасачыць за спраўнасцю механізмаў па ўнясенні ўгнаенняў і закладцы насення.
У СВК “Жухавічы” царыца палёў зойме 1455 га, у тым ліку кукуруза на зерне будзе пасеяна на 364 га, на сілас — 1091 га.
— Пачалі рана, у пачатку красавіка, — кажа Андрэй Бараноўскі. — Потым пахаладала, узялі паўзу. Падчас яе яшчэ раз праверылі спраўнасць тэхнікі, каб у разгар пасяўной яна не падвяла. Надвор’е зноў палепшылася, таму сеем далей.
Андрэй Бараноўскі адзначае, што кукурузу сеюць у асноўным на сілас. У гаспадарцы разлічваюць атрымаць высокую аддачу ад каласавых культур. Калі ж фуражу будзе недастаткова, частку каралевы палёў абмалоцяць на зерне.
Сяргей СТОЛЯР
Фота аўтара
