У рамках экалагічнай акцыі “Беларусь сінявокая” начальнік Карэліцкай раённай інспекцыі прыродных рэсурсаў і аховы навакольнага асяроддзя Сяргей Сянкевіч, прадстаўнікі працоўных калектываў Карэліччыны, актывісты РК ГА «БРСМ» сумесна з першым сакратаром Таццянай Шэўчык арганізавалі працоўны дэсант па ўборцы смецця ў прыбярэжнай паласе ракі Рутка, што ў райцэнтры. Кожнага з удзельнікаў акцыі аб’яднала любоў да роднага краю і імкненне зрабіць нашу прыроду чысцейшай і прыгажэйшай. У выніку сумясцілі прыемнае з карысным.
Маштабная экалагічная акцыя “Беларусь сінявокая” аб’яўлена Міністэрствам прыродных рэсурсаў і аховы навакольнага асяроддзя сумесна з дзяржаўнай інспекцыяй аховы жывёльнага і расліннага свету пры Прэзідэнце Рэспублікі Беларусь і накіравана на захаванне маляўнічых азёр і рэк.
Начальнік Карэліцкай раённай інспекцыі прыродных рэсурсаў і аховы навакольнага асяроддзя Сяргей Сянкевіч адзначае:
– Мэта акцыі – навесці парадак, добраўпарадкаваць тэрыторыі, прылеглыя да сацыяльна значных водных аб’ектаў і нагадаць грамадству пра важнасць беражлівых адносін да прыроды. Забруджванне берагоў пластыкам, бытавымі адходамі і іншымі матэрыяламі не толькі парушае эстэтыку ландшафтаў, але і наносіць шкоду экасістэмам: таксічныя рэчывы трапляюць у ваду, пагражаючы флоры і фаўне, а смецце, якое раскладаецца, атручвае глебу на дзесяцігоддзі. Акцыя “Беларусь сінявокая” – гэта магчымасць аб’яднацца, каб захаваць тое, што робіць краіну ўнікальнай: празрыстыя азёры, звілістыя рэкі і бязмежныя лясы. Падтрымаць акцыю можа кожны неабыякавы.
Уборка прыбярэжных ліній рэк і азёр, а таксама лясоў – не разавая акцыя. Мы стараемся іх праводзіць круглы год і далучаць як мага больш людзей. Бо мала прыбраць смецце, неабходна сваім прыкладам выхоўваць у падрастаючага пакалення беражлівыя адносіны да прыроды роднага краю.
– Удзел у акцыі – гэта не толькі практычная дапамога, але і важны крок да фарміравання экалагічнай культуры насельніцтва. З задавальненнем далучылася да такой патрэбнай спавы. Экалогія, чысціня месцаў адпачынку каля вады, у лесе – гэта важна. Моладзь – самая актыўная частка грамадства. Каму, як не ім, быць наперадзе?! Мы хочам жыць у чысціні і бачыць нашу Карэліччыну прыгожай, – адзначыла першы сакратар Карэліцкага РК ГА «БРСМ» Таццяна Шэўчык.
Кацярына КУКАНАВА
Фота аўтара
