Сёння ў г.п Карэлічы адкрылі мурал, прысвечаны лясной тэматыцы, які ўпрыгожыў фасад шматкватэрнага пяціпавярховага дома па вуліцы Гагарына, 24Б. Слоган малюнка на сцяне пяціпавярхоўкі – “Мы служым лесу, каб лес служыў людзям!”, а сам мурал прапагандуе прафесію ахоўнікаў лесу.
У цырымоніі адкрыцця прынялі ўдзел дырэктар Навагрудскага лясгаса Дзмітрый Каранюк, намеснік кіраўніка па ідэалагічнай рабоце Аляксандр Гарнастай, выхаванцы і выхавальнікі дзіцячага сада № 2 г.п. Карэлічы.
Кіраўнік лясгаса Дзмітрый Каранюк адзначыў, што па ініцыятыве Міністэрства лясной гаспадаркі такія муралы будуць створаны ў кожным лясгасе краіны.
– Лес – нацыянальны здабытак і візітная картка нашай краіны. Гэты мурал – даніна павагі людзям, якія ствараюць і ахоўваюць лясныя багацці. Мы вырашылі размясціць новы арт-аб’ект у г.п. Карэлічы. Месца выбрана сімвалічнае – побач знаходзіцца дзіцячы сад. Дзеці будуць бачыць малюнак і цікавіцца прафесіяй. Хай гэты арт-аб’ект, створаны ў Год добраўпарадкавання, нагадвае і дзецям, і ўсім карэліччанам, і гасцям гарпасёлка, і тым, хто трымае свой шлях у сталіцу нашай краіны, пра тое, што трэба вельмі беражліва ставіцца да лесу, да прыроды.
Загадчык дзіцячага сада Аксана Дзівак, звярнуўшыся да працаўнікоў лясгаса, сказала, што супрацоўніцтва з людзьмі, якія звязалі сваё жыццё з лясной справай, будзе на карысць выхаванцам і педагогам. У 2019 годзе за паспяховую рэалізацыю праекта “Зялёная школа” іх установе быў прысвоены статус “Зялёная школа”, і ўжо на працягу многіх гадоў ім удаецца пацвярджаць яго.
– Мурал, на якім намаляваны работнік лясной галіны, які ідзе за руку з дзіцём, добра відаць з вокнаў нашай установы, пры праездзе па цэнтральнай вуліцы. Арт-аб’ект выдатна ўпісаўся ў інтэр’ер нашага райцэнтра, – дала асабістую ацэнку Аксана Дзівак.
Выхаванцы дзіцячага садка прачыталі падрыхтаваныя з гэтай нагоды вершы пра тое, як важна берагчы лес і прыроду.
На памяць аб мерапрыемстве ад Навагрудскага лясгаса рабятам уручылі памятны падарунак: сувенірны каляндар з малюнкам мурала і салодкія пачастункі.
Кацярына КУКАНАВА
Фота аўтара
