Санстанция установила нарушения в магазинах Кореличского района

Захаванне санітарна-гігіенічных нормаў у гандлёвых кропках  Карэліччыны знаходзіцца на пастаянным кантролі ў спецыялістаў раённага цэнтра гігіены і эпідэміялогіі. У гэтым упэўніліся падчас  чарговага сумеснага рэйду ў аграгарадок Турэц,  дзе знаходзяцца гандлёвыя павільёны “Свежанька” і “Прадукты”,   магазіны “Еўраопт”  і “Хіт”, што ў г.п. Карэлічы.

Такі кантроль за гандлем ажыццяўляецца з мэтай прафілактыкі і папярэджання парушэнняў рэалізацыі прадуктаў харчавання  зацікаўленымі органамі ва ўзаемадзеянні з суб’ектамі, якія падлягаюць нагляду. І гэта нядзіўна, бо рэалізацыя сапсаванага тавару, невыкананне нормаў СанПіНа можа прывесці да неспрыяльнай сітуацыі па захворванні насельніцтва. Гэта недапушчальна ні пры якіх абставінах.

У  наведаных гандлёвых аб’ектах, якія належаць прыватным асобам,  вітрыны чыстыя, пратэрмінаванай прадукцыі сярод выбарачна праверанай заўважана не было, ёсць якасная маркіроўка на кожны від прадукцыі,  умовы захоўвання тавару і тэмпературны рэжым выконваюцца. Але, на жаль, без недахопаў не абышлося. Не паклапаціліся адказныя за гандаль асобы аб набыцці ўборачнага інвентару для сваіх гандлёвых кропак, а калі ён ёсць, то няма выразнай маркіроўкі. У  павільёне “Свежанька”  адсутнічае прыбор кантролю тэмпературна-вільготнаснага рэжыму памяшкання, а ў павільёне “Прадукты” дэзынфікуючы сродак “Септацыд” са скончаным тэрмінам прыдатнасці.  Некаторыя  дрэнна клапоцяцца  і аб мерах бяспекі сваіх пакупнікоў: пры ўваходзе ў магазін не ачышчаны  ад снегу ганак і прыступкі, а гэта вельмі небяспечна ў зімовы час.

Па выніках праверкі санітарнай службай накіраваны  рэкамендацыі па  ліквідацыі выяўленых парушэнняў на  правераных гандлёвых аб’ектах.

Кацярына КУКАНАВА