У Красненскім сельвыканкаме адбылося пасяджэнне Савета грамадскага пункта аховы правапарадку
Сямейныя скандалісты, дармаеды, грамадзяне, схільныя да ўжывання спіртных напояў, асацыяльных паводзін, асобы, якія не працуюць, – цэлая галерэя вобразаў паўстала перад членамі пазачарговага пасяджэння Савета грамадскага пункта аховы правапарадку, якое адбылося 30 сакавіка ў Красненскім сельвыканкаме.
Асноўная задача, якую праследуюць зацікаўленыя службы і органы мясцовай улады, – зрабіць так, каб у сем’ях жыхароў сельсавета, на вуліцах яго населеных пунктаў панавалі мір і згода. А там, дзе ёсць праблема, не адвярнуцца, а працягнуць руку дапамогі, своечасова папярэдзяць аб небяспечных наступствах асацыяльных паводзін. На пасяджэнне савета ГПАП былі запрошаны 13 чалавек: асобы, якія стаяць на прафілактычным уліку ў Карэліцкім РАУС, злоўжываючыя спіртнымі напоямі, непрацуючыя і іншыя асобы, якія маюць схільнасці да правапарушэнняў.
Сцэнар разгледжаных спраў падобны: менавіта з-за п’янства здзяйсняюцца многія правапарушэнні, развальваюцца сем’і, пакутуюць блізкія людзі.
Амплуа сямейных скандалістаў і аматараў алкагольных напояў мелі двое запрошаных. Адзін з іх – бацька сямейства, які не лічыць, што сваімі паводзінамі ён калечыць псіхіку непаўналетніх. Выслухаўшы тлумачэнні запрошанага, члены савета калегіяльна шукалі шляхі для паляпшэння жыццёвых абставінаў у сям’і. Прадстаўнік РАУС у сваіх ацэнках ладу жыцця сям’і быў катэгарычны: калі бацькі не навучацца жыць у згодзе, то ў заканадаўчай сістэмы ёсць рычагі для таго, каб засцерагчы дзяцей ад негатыўнага на іх ўплыву блізкіх.
Сяброўства з “зялёным зміем”, як вядома, да дабра не даводзіць. Так адбылося і ў выпадку з механізатарам, які быў затрыманы супрацоўнікамі ДАІ за тое, што кіраваў трактарам у стане алкагольнага ап’янення. Як вынік – на пяць гадоў пазбаўлення права кіравання транспартным сродкам і штраф 200 базавых велічынь. А ці патрэбна была такая язда?!
У кожнага з запрошаных свой лёс. Гэта, як ніхто іншы, разумеюць члены камісіі, яны не выносяць прысуд, а ўсімі спосабамі спрабуюць вярнуць тых, хто «заблудзіўся», да нармальнага жыцця. Спрабуюць дастукацца да свядомасці кожнага, прыводзячы канкрэтныя прыклады з жыцця іх аднагодкаў і аднавяскоўцаў, зберагчы ад фатальных памылак, якія прыводзяць да трагедый.
Супрацоўнік РАНС Павел Купрас у чарговы раз правёў індывідуальную тлумачальную гутарку з запрошанымі грамадзянамі. Асацыяльны лад жыцця павялічвае рызыку ўзнікнення пажараў па прычыне курэння ў нецвярозым стане, а гэта небяспечна не толькі для яго самога, але і для родных, суседзяў. Участковы інспектар РАУС Раман Шнок папярэдзіў аб тым, што верагоднасць трапіць у месцы пазбаўлення волі альбо на прымусовае лячэнне ўзрастае з кожным неабдуманым учынкам. Начальнік упраўлення па працы, занятасці і сацыяльнай абароне Карэліцкага райвыканкама Іна Богуш асабіста кожнаму непрацуючаму прапанавала працоўныя вакансіі.
Савет вынес грамадзянам папярэджанні аб магчымых наступствах у выпадку працягу асацыяльных паводзін у будучым. Ад усіх атрыманы запэўненні выправіцца і перагледзець свае жыццёвыя арыенціры. Прычым па кожнай сітуацыі прыняты рашэнні і дадзены даручэнні з вызначэннем тэрмінаў выканання, якія будуць пад кантролем зацікаўленых службаў.
Кацярына КУКАНАВА
Фота аўтара
