В Кореличском районе прошли первые сессии сельских Советов
Першая сесія Цырынскага сельскага Савета дэпутатаў дваццаць дзявятага склікання прайшла 6 сакавіка ў аграгарадку Цырын. Удзел у яе рабоце прыняў старшыня Карэліцкага раённага Савета дэпутатаў Аляксей Гаўрош.
Адкрыла сесію старшыня сельскай выбарчай камісіі Святлана Русак, якая адзначыла, што выбары ў сельвыканкаме прайшлі ў спакойнай абстаноўцы пры высокай актыўнасці насельніцтва. На тэрыторыі Цырынскага сельскага Савета выбрана шэсць дэпутатаў. 79% выбаршчыкаў рэалізавалі сваё канстытуцыйнае права па вызначэнні складу мясцовых Саветаў дэпутатаў.
Ад імя сельскай выбарчай камісіі яна павіншавала прысутных з абраннем дэпутатамі Цырынскага сельвыканкама і ўручыла пасведчанні дэпутатаў.
На сесіі былі абраныя сакратарыят і падліковая камісія, а затым дэпутаты перайшлі да галоўнага пытання парадку дня — выбару старшыні Цырынскага сельскага Савета дэпутатаў дваццаць дзявятага склікання.
Слова ўзяў старшыня Карэліцкага раённага Савета дэпутатаў Аляксей Гаўрош, які, павіншаваўшы ўсіх дэпутатаў з абраннем, прапанаваў ім для разгляду на абранне старшынёй Цырынскага сельскага Савета дэпутатаў кандыдатуру Аксаны Гомзы, дэпутата па Быкевіцкай выбарчай акрузе № 1.
– Я думаю, што гэтая кандыдатура вам усім добра вядомая, — адзначыў Аляксей Іванавіч. — Аксана Віктараўна мае досвед працы ў органах мясцовай улады, зарэкамендавала сябе як кіраўнік, які ўмее ўзаемадзейнічаць з насельніцтвам.
У бюлетэнь для тайнага галасавання па выбарах старшыні Цырынскага сельскага Савета дэпутатаў дваццаць дзявятага склікання была ўнесена кандыдатура Аксаны Гомзы, і яна аднагалосна была выбрана на гэтую пасаду.
Аляксей Гаўрош павіншаваў Аксану Віктараўну з абраннем, пажадаў ёй поспехаў на гэтай ніве і выказаў упэўненасць, што на пасадзе старшыні сельсавета яна праявіць свае лепшыя якасці і створыць згуртаваную каманду дэпутатаў, якая будзе эфектыўна ўдзельнічаць у вырашэнні пытанняў жыццезабеспячэння выбаршчыкаў.
Затым паўнамоцтвы вядзення сесіі былі перададзены Аксане Гомзе, якая шчыра падзякавала дэпутатам за падтрымку і аказаны давер:
— Сваю задачу бачу ў тым, каб разам з вамі прадоўжыць работу па ўстойлівым развіцці нашага краю, садзейнічаць якаснай рэалізацыі намечаных планаў і задач у інтарэсах жыхароў нашага сельвыканкама, — падкрэсліла Аксана Віктараўна.
Дэпутаты выбралі таксама намесніка старшыні Цырынскага сельскага Савета дэпутатаў — ім стала Наталія Адамушка, дэпутат па Аканавіцкай выбарчай акрузе № 2.
Кацярына КУКАНАВА
Фота аўтара
