7 экспонатов Мирского замка пополнили Государственный список историко-культурных ценностей
18 красавіка адзначаецца Міжнародны дзень помнікаў і гістарычных мясцін. З гэтай нагоды журналіст гутарыць з метадыстам па ахове гісторыка-культурнай спадчыны аддзела метадычнай работы ДУ «Карэліцкі раённы Цэнтр культуры і народнай творчасці» Анастасіяй Аляксандраўнай КРАСНОЎСКАЙ.
— Анастасія Аляксандраўна, якія помнікі ахоўваюцца дзяржавай на Карэліччыне?
— У Дзяржаўны спіс гісторыка-культурных каштоўнасцей Рэспублікі Беларусь Карэліцкага раёна ўключана 36 гісторыка-культурных каштоўнасцей (43 аб’екты ў іх складзе), у тым ліку 14 помнікаў архітэктуры, 6 — археалогіі, 4 — гісторыі, 12 — рухомых помнікаў мастацтва і гісторыі. З іх у сакавіку 2018 года ў Дзяржаўны спіс гісторыка-культурных каштоўнасцей Рэспублікі Беларусь унесена 7 матэрыяльна рухомых аб’ектаў гісторыка-культурнай спадчыны: матрыца пячаткі Юрыя Іллініча герба «Урубы», шпалера «Паляванне», шпалера з выявай сцэны з антычнай гісторыі, кніга «TOMVS QVARTVS», кабінет (шафа), кубак, крыж-энкалпіён. Усе яны належаць установе «Музей «Замкавы комплекс «Мір».
— У чым сэнс аховы гэтых аб’ектаў?
— 3 лютага 2017 года ўступіў у сілу Кодэкс аб культуры Рэспублікі Беларусь, які ўвабраў у сябе ўсе этапы аховы гісторыка-культурных каштоўнасцей — ад вылучэння культурных каштоўнасцей для надання статусу гісторыка-культурнай каштоўнасці да выкарыстання матэрыяльных гісторыка-культурных каштоўнасцей.
Таксама штогод праводзіцца маніторынг стану і выкарыстання гісторыка-культурных каштоўнасцей Карэліцкага раёна, па выніках якога ўсе недахопы ў пісьмовым выглядзе накіроўваюцца ўласнікам для іх выпраўлення.
— Які аб’ект на Карэліччыне можна назваць асаблівым?
— Візітнай карткай, жамчужынай нашага раёна была, ёсць і будзе ўстанова “Музей “Замкавы комплекс “Мір”. Помнік архітэктуры мае сваю гісторыю, ён прываблівае турыстаў роднай Беларусі і замежжа. І гэта, безумоўна, радуе: пра Карэліччыну ведаюць у свеце, да нас прыязджаюць, каб пазнаёміцца з гістарычным мінулым і наталіцца навакольнымі краявідамі, і турысты атрымліваюць жадаемае.
— Скажыце, што плануецца правесці ў раёне з нагоды Міжнароднага дня помнікаў?
— Сёлета да Міжнароднага дня помнікаў і гістарычных мясцін адбудзецца квэст-гульня «Гісторыя аднаго горада», у ходзе якой супрацоўнікі Цэнтра культуры і народнай творчасці пазнаёмяць мясцовых жыхароў са шматлікімі памятнымі і гістарычнымі месцамі г. п. Карэлічы.
Гутарыла
Галіна СМАЛЯНКА.
Гісторыка-культурныя каштоўнасці Карэліцкага раёна
Помнікі архітэктуры:
- Комплекс Мікалаеўскага касцёла (комплекс Мікалаеўскага касцёла: касцёл, брама з агарождай і званіцай, будынак былых школы і шпіталя), г.п. Мір, вул.Чырвонармейская, 13.
- Троіцкая царква ў г.п. Мір, г.п. Мір, вул. 17-ага Верасня, 2.
- Царква св. Варвары ў в. Райца, агр. Райца.
- Царква Пакрова Прасвятой Багародзіцы ў в. Турэц.
- Будынак былога бровара, г.п. Карэлічы, вул. Фаменкі, 13.
- Палацава-замкавы комплекс“Мір”, г.п. Мір, вул. Чырвонаармейская, 2.
- Замак, г.п. Мір, вул. Чырвонаармейская, 2.
- Пейзажны парк, г.п. Мір, вул. Чырвонаармейская, 2.
- Флігель, г.п. Мір, вул. Чырвонаармейская, 2.
- Уязная брама з домікам вартаўніка, г.п. Мір, вул. Чырвонаармейская, 2.
- Прыдарожная капліца, г.п. Мір, вул. Чырвонаармейская, 2.
- Капліца-пахавальня князёў Святаполк-Мірскіх, г.п. Мір, вул. Чырвонаармейская, 2.
- Мазаічны абраз “Спас Пантакратар”, г.п. Мір, вул. Чырвонаармейская, 2.
- Будынак былога пастарунка, г.п. Мір, вул. Кірава. 51.
Памятнікі археалогіі:
- Гарадзішча перыяду Жалезнага веку ў в. Беразавец.
- Курганны могільнік Плужыны.
- Гарадзішча перыяду Сярэднявечча ў в. Сёгда.
- Курганны могільнік Скрышава.
- Стаянкі перыяду каменнага і бронзавага вякоў у в. Ярэмічы.
- Гарадзішча Варонча, агр. Варонча.
Помнікі гісторыі:
- Брацкая магіла ў в. Сіняўская Слабада.
- Брацкая магіла ў г.п. Мір.
- Воінскія могілкі ў г.п. Карэлічы, вул. 8-ага Сакавіка.
- Брацкая магіла ў в. Малыя Жухавічы.
Помнікі мастацтва:
- Касанэ, г.п. Мір, вул. Чырвонаармейская, 2.
- Барабан кавалерыйскі (сігнальны) кацёл, г.п. Мір, вул. Чырвонаармейская, 2.
- Рогі тура, г.п. Мір, вул. Чырвонаармейская, 2.
- Стол, г.п. Мір, вул. Чырвонаармейская, 2.
- Стул, г.п. Мір, вул. Чырвонаармейская, 2.