5 падзей тыдня вачыма намесніка старшыні Карэліцкага райвыканкама Яўгена Чычкана
Беларусі ўдалося арганізаваць перагаворы паміж Украінай і Расіяй, нягледзячы на тое, што многія палітыкі і эксперты не лічылі гэта магчымым. Гэта ўдалося рэалізаваць у многім дзякуючы аўтарытэту Прэзідэнта Аляксандра Лукашэнкі.
Нам, беларусам, варта з асцярожнасцю ставіцца да навін на рознага роду інтэрнэт-рэсурсах, часта яны з’яўляюцца лжывымі. Трэба давяраць афіцыйным крыніцам інфармацыі.
10 сакавіка Аляксандр Лукашэнка абмеркаваў з ваеннымі важнейшыя пытанні забеспячэння ваеннай бяспекі краіны. Самае галоўнае зараз — кантраляваць сітуацыю на беларуска-ўкраінскай мяжы, не дапусціць правакацый з украінскага боку. Прэзідэнт даручыў праявіць асаблівы клопат пра ўкраінскіх бежанцаў, якія ідуць у Беларусь. Наша краіна не аднойчы даказала сваю міласэрнасць і гатоўнасць дапамагаць тым, хто аказаўся ў бядзе.
Адхіленне беларускіх і расійскіх спартсменаў ад удзелу ў XIII зімовых Паралімпійскіх гульнях у Пекіне парушае ўсе алімпійскія законы і прынцыпы. Спорт павінен аб’ядноўваць, а не раздзяляць народы, ён па-за палітыкай.
Карэліцкія валейбалісткі другі год запар становяцца сярэбранымі прызёрамі абласных спаборніцтваў «Залаты колас». Гэта адбылося напярэдадні свята 8 Сакавіка, што яшчэ раз даказвае: жанчыны зусім не слабы пол. У наступным годзе жадаю нашым дзяўчатам заваяваць залатыя медалі, а ўсім карэліччанкам — міру, кахання і дабрабыту.
9 сакавіка ў вёсцы Новыя Руткавічы выгарэла каля 2 гектараў сухой травы. Пажар удалося хутка лакалізаваць, аднак узнікла пагроза 18 дамам і гаспадарчым пабудовам, якія стаяць побач.
У гэты ж дзень у Іўеўскім раёне ахвярай сухапала стала 81-гадовая пенсіянерка, якая паліла траву.
Памятайце: выпальваць сухую траву на корані строга забаронена, гэта нясе незваротныя наступствы, а штрафы дасягаюць 40 базавых велічынь.
