Старшыня Карэліцкага райвыканкама Генадзій Шатуеў: «2022 год для эканомікі Беларусі стаў цалкам паспяховым. І ўсё гэта нягледзячы на ціск і санкцыі з боку Захаду»

06-02-2023 Фото Алексея Бибикова. Гродненская область, г.п. Кореличи. Геннадий Шатуев, председатель Кореличского райисполкома.

— 2022 год для эканомікі Беларусі стаў цалкам паспяховым. І ўсё гэта нягледзячы на ціск і санкцыі з боку Захаду, — адзначае старшыня Карэліцкага райвыканкама Генадзій Шатуеў.

 

Прэзідэнт нашай краіны Аляксандр Лукашэнка граматна і ўпэўнена выбудоўвае знешнюю палітыку Беларусі. Падпісаны пагадненні аб супрацоўніцтве ў розных сферах, у першую чаргу ў эканамічнай, з важнымі партнёрамі: Расіяй, Кітаем, Іранам, Аб’яднанымі Арабскімі Эміратамі.

Сёння гэта буйныя сусветныя краіны, якім патрэбны беларускія калійныя ўгнаенні, сельскагаспадарчая тэхніка, якасныя прадукты харчавання. Краіны з моцнай уладай аб’ядноўваюцца, каб вырашаць праблемы санкцый, развіваць эканоміку і будаваць шматпалярны свет.

Тое, што санкцыйнаму ціску Захада можна супрацьстаяць, даказвае Іран. Ужо больш за 40 гадоў краіна жыве ва ўмовах жорсткіх фінансавых абмежаванняў, якія ініцыявалі ЗША. І нядрэнна жыве, даволі паспяхова развіваецца.

Па выніках 2022 г. Кітай стаў другім гандлёвым партнёрам Беларусі пасля Расіі. Тавараабарот з Паднябеснай пабіў усе рэкорды і склаў практычна 5,8 мільярда долараў, павялічыўшыся за апошнія пяць гадоў у 1,5 раза. Па выніках 2022 г. Беларусь знаходзіцца ў дзясятцы краін-пастаўшчыкоў у Кітай калійных угнаенняў (2-е месца), рапсавага алею (4-е), мяса курыцы (6-е), сухога малака (7-е), замарожанай ялавічыны і малочнай сыроваткі (8-е). І гэтыя паказчыкі ў новым годзе будуць толькі расці.

Зараз на ўзроўні кіраўнікоў дзяржавы разглядаецца развіццё сухапутнага транспартнага калідора Поўнач-Поўдзень, які пройдзе праз Расію, Азербайджан і Іран. Як заявіў Уладзімір Пуцін, Расія можа сабраць пул інвестараў і сама праінвеставаць у будаўніцтва. Беларусь жа ў гэтым зацікаўлена: пасля стварэння калідора па ім, як плануецца, будуць ісці пастаўкі звыш 40 млн т грузаў.

Як бачым, не Захадам адзіным жыве чалавецтва, і для Беларусі шырока адкрыта акно на ўсход.

СКАЗАНА

— Усё грунтуецца на эканоміцы… Будзе эканоміка — усё астатняе мы вырашым. На працягу года мы не раз праводзілі нарады, выпрацоўвалі папераджальныя і кампенсавальныя меры, ацэньвалі іх дзейснасць, знаходзілі вокны магчымасцяў. Такім чынам атрымалі каласальны вопыт развіцця нават у такіх беспрэцэдэнтных умовах. Таму можна з упэўненасцю казаць, што экзамен на эканамічную ўстойлівасць мы ў цэлым вытрымалі… Усе павінны бачыць перспектыву і дзейнічаць стратэгічна. Тады 2023 год стане яшчэ адным крокам нашага развіцця.

10 сакавіка 2023 года,

Аляксандр Лукашэнка на пасяджэнні Савета Міністраў пад кіраўніцтвам Прэзідэнта.

Іна ЛЕЙКА

Фота з архіва рэдакцыі