В летнем оздоровительном лагере «Вясёлка» закончилась оздоровительная кампания
У летнім аздараўленчым лагеры “Вясёлка” адбылася ўрачыстая цырымонія закрыцця апошняй лагернай змены “#Вектар поспеху”, падчас якой разам са школьнікамі Карэліччыны адпачывалі падлеткі з горада Краснагорска Расійскай Федэрацыі.
Ганаровымі гасцямі мерапрыемства сталі начальнік аддзела адукацыі Карэліцкага райвыканкама Ірына Асташэвіч і настаяцель храма святой Варвары агр. Райца Аляксей Шышкір.
Ірына Асташэвіч сказала:
— Вельмі прыемна і трошкі сумна сёння прысутнічаць на ўрачыстасці таму, што заканчваецца не толькі чарговая лагерная змена, але і аздараўленчая кампанія 2023 года. Я спадзяюся, што ў кожнага з вас засталіся самыя прыемныя ўражанні ад адпачынку і жаданне прыехаць сюды на наступны год.
Ад імя аддзела адукацыі Карэліцкага райвыканкама Ірына Валер’еўна выказала словы ўдзячнасці ўсім, хто сёлета працаваў у летніку. Найлепшыя словы пажадання былі выказаны і ў адрас расійскай дэлегацыі.
Святар Аляксей Шышкір падзякаваў супрацоўнікам і дзецям за сумесную працу, якую ўдалося арганізаваць падчас летняй аздараўленчай кампаніі.
На працягу ўсёй змены дзеці былі ўцягнутыя ў калейдаскоп розных падзей і спраў. Кожны наступны дзень быў непадобны на папярэдні і напоўнены новымі ўражаннямі, зносінамі і сустрэчамі з цікавымі людзьмі. Дзеці знаходзіліся на свежым паветры, педагогі праводзілі аздараўленчыя, спартыўныя, культурна-масавыя мерапрыемствы, арганізоўвалі экскурсіі і заняткі па інтарэсах.
Для кожнага дзіцяці аздараўленчы лагер “Вясёлка» адкрыўся сваёй гранню: нехта знайшоў новых сяброў, хтосьці адкрыў у сабе новыя творчыя здольнасці, даведаўся аб нечым цікавым, а хто і навучыўся не засмучацца пры паражэнні ў гульні. Уражанні незабыўныя, і памяць пра іх застанецца ў дзяцей на доўгія гады.
Самыя актыўныя ўдзельнікі мерапрыемстваў, акрамя слоў удзячнасці, атрымалі дыпломы і памятныя падарункі.
Завяршылася ўрачыстасць святочным развітальным канцэртам.
Юныя карэліччане падзяліліся ўражаннямі ад адпачынку
Аляксандра Раткевіч з г.п. Мір адзначыла:
— Наш лагер “Вясёлка” самы лепшы. Я кожны год, пачынаючы з 2017-га, прыязджаю сюды. Адпачываючы тут, заўсёды набываю новых сяброў і атрымліваю зарад бадзёрасці. Цудоўна і тое, што да нас прыязджаюць на адпачынак дзеці з горада-пабраціма Краснагорска. За час адпачынку яны сталі для нас сапраўднымі сябрамі.
Мацвей Ліннік з г.п. Мір падзяліўся:
— Я прыехаў у лагер у другі раз. Тут вельмі добрая прырода і паветра. Гэта дапамагае аднавіць здароўе. Першыя дні запомніліся, вядома ж, дыскатэкамі, таму што тут добрая апаратура, можна павесяліцца, пазнаёміцца з новымі рабятамі. Усе таварыскія, ніякіх складанасцяў не было. Я магу параіць адно: летам трэба не сядзець дома, а часцей ездзіць па такіх месцах, каб развеяцца, набыць новых знаёмых. Гэта падымае настрой.
Слова — моладзі з г. Краснагорска
Кіраўнік дэлегацыі горада Краснагорска Аляксандра Раткевіч сказала:
— Хочацца выказаць словы ўдзячнасці ўсім, хто арганізаваў цудоўны адпачынак для нашых дзяцей у лагеры “Вясёлка”, за вашу гасціннасць, спагадлівасць і дабрыню. Мы рады быць гасцямі і ўжо добра ведаем, што ў Беларусі вельмі здорава, і гэта сапраўды так. Усе мы будзем доўга памятаць людзей, якія прымалі нас у летніку. Усё, што ўбачылі на Карэліччыне, пакінула вялікія ўражанні. Усе рабяты дружна сказалі, што хочуць на наступны год прыехаць сюды зноў. Спадзяёмся, што і ў будучым будзем абменьвацца дэлегацыямі. Галоўнае, каб сябравалі не толькі дзяржавы, але і дзеці.
Аляксандр Лапціеў падзяліўся:
— Мне і маім сябрам надоўга запомніцца цікавы і актыўны адпачынак у летніку. Кожны дзень былі займальныя мерапрыемствы, у якіх мы з радасцю прымалі ўдзел. Незабыўныя ўражанні засталіся пасля паездак і экскурсій. Нам вельмі сумна пакідаць гэты сапраўдны райскі куток: “Вясёлка” стала нашым другім домам.
Кацярына КУКАНАВА
Фота аўтара