Об итоговой аттестации учащихся 11 классов рассказывает начальник отдела образования Ирина Осташевич
Канец навучальнага года – гарачая пара для выпускнікоў школ. У іх пачынаецца адзін з самых складаных перыядаў у жыцці, калі неабходна паспець зрабіць тысячу спраў.
Аб арганізацыі і правядзенні выніковай атэстацыі навучэнцаў 11 класа расказвае начальнік аддзела адукацыі Карэліцкага райвыканкама Ірына Асташэвіч.
— Сёлета ў раёне 76 выпускнікоў. Усе яны ўжо вызначыліся з прадметамі, па якіх будуць здаваць цэнтралізаваны экзамен, і цяпер змяніць выбраны імі прадмет нельга. Рэгістрацыя была завершана 5 красавіка. Паводле яе дадзеных, выпускнікі школ раёна 27 мая будуць здаваць ЦЭ па выбары па сямі прадметах (матэматыка – 40 чалавек, гісторыя Беларусі – 10, грамадазнаўства – 8, хімія і англійская мова – па 6, біялогія і фізіка – па 3).
30 мая 24 выпускнікі будуць здаваць ЦЭ па рускай і 52 – па беларускай мовах.
Вызначаны пункт правядзення ЦЭ – гэта сярэдняя школа № 1 г.п. Карэлічы. Створаны экзаменацыйныя камісіі, вызначаны адказныя, якія будуць працаваць у аўдыторыях, распрацаваны графікі падвозу выпускнікоў да пункта правядзення іспытаў. Калі навучэнец справіўся з заданнямі хутчэй, то на пункце правядзення экзаменаў прадугледжана асобнае памяшканне з асобным уваходам.
Што тычыцца шкалы ацэнкі цэнтралізаванага іспыту, то яна не змянілася.
– Шкала ацэнкі ЦЭ вядомая, з кастрычніка мінулага года яна размешчана на сайце Міністэрства адукацыі Рэспублікі Беларусь. Яна выкарыстоўвалася і пры правядзенні рэпетыцыйнага тэсціравання, і пры правядзенні рэпетыцыі ЦЭ. Яна ж будзе выкарыстоўвацца і пры правядзенні цэнтралізаванага экзамену і цэнтралізаванага тэсціравання ў 2024 годзе, – падкрэсліла начальнік аддзела адукацыі райвыканкама.
Кацярына КУКАНАВА