Кореличский сырцех делает ставку на качество

У актавай зале адміністрацыйнага будынка Карэліцкага сырцэха  “Навагрудскія Дары” філіяла ААТ “Лідскі малочна-кансервавы камбінат”  за шкляной вітрынай — цэлая галерэя ўзнагарод, якіх удастоена прадукцыя прадпрыемства на розных рэспубліканскіх і міжнародных конкурсах. Ужо на працягу шэрагу гадоў прадукцыя карэліцкіх сыраробаў разам з іншымі малочнымі прадуктамі ААТ “Лідскі малочна-кансервавы камбінат”  заваёўвае прызавыя месцы на міжнародных выставах прадуктаў харчавання, напояў і сыравіны  “Прадэкспа” ў Маскве,  “Белагра” ў Мінску, на рэспубліканскім конкурсе спажывецкіх пераваг “Прадукт года”, на адкрытых фестывалях сыру ў Гродне. Гэтымі дасягненнямі, безумоўна, ганарацца ўсе, хто працуе на прадпрыемстве, марку якога ведаюць і цэняць не толькі ў нас у краіне, але і  за яе межамі.

Галоўным сакрэтам поспеху, як прынята гаварыць  у такіх сітуацыях, з’яўляецца якасць выпускаемай прадукцыі.

— Планку якасці мы паднялі  высока, і падтрымліваць яе складана, але ў нас іншага выйсця няма, мы павінны гэта рабіць, таму што канкурэнцыя на рынку не дае расслабляцца, — кажа начальнік вытворчага цэха  Ларыса Рапавец.

Галоўнай рухаючай сілай, якая спрыяе эканамічнай эфектыўнасці прадпрыемства, з’яўляецца калектыў, у якім працуе 56 чалавек. Палова з іх – работнікі кацельні, механічнай і дапаможнай службаў. Непасрэдна выпускам прадукцыі заняты 21  спецыяліст. Гэта сапраўдныя прафесіяналы сваёй справы. Сярэдні ўзрост працуючых – 47,5 гадоў.  Але ў гэтым і ёсць галоўныя перавагі, паколькі вопыт і веды заўсёды ў цане. Карэліцкі цэх, не гонячыся за навінкамі і моднымі тэндэнцыямі, застаецца верны “Адыгейскаму класічнаму” сыру,  які на працягу многіх гадоў займае лідзіруючую пазіцыю на айчынных і замежных конкурсах. Дзякуючы выдатнай якасці і смаку тавар заўсёды запатрабаваны.

За студзень-лістапад бягучага года экспартная выручка склала больш 2 мільёнаў долараў ЗША. Большая  яе частка  – продаж тэхнічнага казеіну  за межы краіны:   у Германію, Расію, Кітай і Польшчу.

Задаволіць жаданне спажыўца  –  галоўная мэта калектыву сыраробнага цэха. Больш за адзінаццаць гадоў яго ўзначальвае Ларыса Рапавец. Вернымі памочнікамі начальніка сырцэха з’яўляюцца старшы майстар Алена Гімпель,  старшы лабарант Марына Хілімон, а таксама майстры Вольга Гіз і Ксенія Баранчык. Даўно заўважана, што па смаку карэліцкія  сыры не саступаюць прадукту іншых вытворцаў, а некаторыя нават пераўзыходзяць. Такая арыгінальнасць рэцэптуры – шмат у чым заслуга яе распрацоўшчыкаў, тэхналагічнай службы прадпрыемства на чале з Нінай Шкнай. Але, па словах кіраўніка вытворчасці, ёсць яшчэ адзін сакрэт смаку  прадукцыі карэліцкіх перапрацоўшчыкаў. “Працоўны дзень павінен пачынацца з усмешкі! – пераканана Ларыса Рапавец. – Улічваючы тое, што ў цэху працуюць жанчыны, для кожнай з іх важны добры настрой, каб і работа ішла спарней, і сыр варыўся”. Начальнік вытворчасці таксама ўпэўнена, што на любым прадпрыемстве павінна быць пераемнасць пакаленняў. Гэта вельмі важна. Калі ў калектыве ёсць людзі з вялікім практычным вопытам, з якімі можна параіцца, як паступаць у той ці іншай сітуацыі, можна пазбегнуць многіх памылак. Навошта пачынаць усё з нуля, калі ёсць магчымасць перадаваць веды з пакалення ў пакаленне.

— Сыраробаў здаўна лічылі чараўнікамі, бо ў іх руках з простага малака нараджаўся дзіўны прадукт. І хоць сёння амаль увесь працэс падрыхтоўкі дыктуе камп’ютар і быць вялікім кулінарам не трэба, усё ж без душы  добры сыр не атрымаецца. Вытворчасць сыру —  гэта складаны тэхналагічны працэс, і тут важны вопыт, які напрацоўваецца дзесяцігоддзямі і нават стагоддзямі,  — лічыць сырароб Алена Дземянчук. — Трэба любіць тое, што ты робіш, любіць людзей, якія цябе акружаюць. А наогул, мне падабаецца праца на вытворчасці і зносіны з людзьмі.

Вытворчыя магутнасці прадпрыемства дазваляюць прымаць і перапрацоўваць 100 тон сыравіны ў суткі, выпрацоўваць 1 тону сыру, 2 тоны тэхнічнага казеіну, 5 тон заменнікаў суцэльнага малака. Малако выдатнай якасці паступае з дзвюх сыравінных зон  – Карэліцкага і Навагрудскага раёнаў. Высокая якасць сыравіны адлюстроўваецца і на канчатковай прадукцыі, якая не залежваецца. Вырабленае сёння – ужо заўтра  на стале спажыўца.

Сёлета карэліцкімі вытворцамі была выпушчана  пробная партыя паўцвёрдага вэнджанага сыру “Рамзес”.  Шчыльная кансістэнцыя,  запамінальны водар,  яркія ноткі ў смаку – усё гэта прыйшлося даспадобы спажыўцу. І ўжо ў 2024 годзе выраб сыру такога гатунку мясцовымі сыраварамі будзе пастаўлены на паток.

Канкурэнтаздольнае прадпрыемства паспяхова развіваецца, і тут упэўнены: той, хто добра працуе, мае права добра адпачываць. Прафсаюз аплачвае экскурсіі, закупляе білеты на канцэрты і спектаклі.  У гэтым годзе члены прафсаюзнай арганізацыі пабывалі    на спектаклі “Юнона і Авось” у Гродзенскай абласной філармоніі, наведалі     казачную краіну МаліВур, што пад Мінскам, былі ў Дзяржаўным музеі  Вялікай Айчыннай вайны, а таксама  ў інтэрактыўным музеі “Квантум”,  мемарыяльным комплексе “Хатынь”. Сумесны адпачынак, па  словах Ларысы Міхайлаўны, аб’ядноўвае калектыў і выхоўвае камандны дух.  Кожнаму работніку прадастаўляецца поўны сацпакет і распрацавана сістэма прэмій. Увогуле,  калектыў  сырцэху жыве  актыўным  грамадскім жыццём Карэліччыны. Іх каманда  – пастаянны ўдзельнік патрыятычных акцый, спартыўна-масавых мерапрыемстваў  і  раённых спартакіяд,  сёлета ўпершыню прымалі ўдзел і ў раённым турыстычным злёце.

Вось так,  нічога не застаецца, як пагадзіцца з тым, што  вытворчасць у паўсотні чалавек можа рабіць сапраўды вялікую справу: цешыць з году ў год сваімі вырабамі  як вытанчаных гурманаў, так і  аматараў малочных прысмакаў.

У тэму

Кіраўнік дзяржавы Аляксандр Лукашэнка падпісаў Указ № 375 “Аб аб’яўленні 2024 года Годам якасці”.

Дадзенае рашэнне прынята ў мэтах далейшага павышэння якасці жыцця беларускага народа, забеспячэння канкурэнтаздольнасці нацыянальнай эканомікі на сусветнай арэне, стымулявання ініцыятывы, фарміравання ў грамадстве адказнасці за вынікі сваёй працы і пачуцця датычнасці да будучыні краіны.

У рамках Года якасці будзе зроблены акцэнт на павышэнні канкурэнтаздольнасці Беларусі праз беражлівае і прадуманае стаўленне да рэсурсаў, рэалізацыю высокатэхналагічных і энергаёмістых праектаў, прыярытэт якасных паказчыкаў над колькаснымі. Намаганні будуць сканцэнтраваны на забеспячэнні якасных паказчыкаў шляхам стымулявання ініцыятывы, укаранення рацыяналізатарскіх ідэй, умацавання ў грамадстве сацыяльнага аптымізму, імкнення ствараць на агульнае дабро. Прыярытэтную ўвагу плануецца надаць фарміраванню ў грамадзян асабістай адказнасці за дасягненне высокай якасці жыцця (дастатковы ўзровень даходу, своечасовая дыспансерызацыя, здаровае харчаванне, добрая адукацыя, культурны вольны час).

Кацярына КУКАНАВА

Фота аўтара