Домік у вёсцы чакае гаспадара
Тэма пустуючых і старых дамоў у сельскай мясцовасці не губляе сваёй актуальнасці на працягу многіх гадоў. Нічога не зробіш, працэс урбанізацыі няспынна ідзе ва ўсім свеце, людзі па-ранейшаму імкнуцца ў вялікія гарады. Што рабіць з пустуючымі дамамі, у якіх ніхто не жыве гадамі, — пытанне, які паступова вырашаецца на мясцовым узроўні. На яго ў чарговы раз спрабавалі адказаць на пасяджэнні Карэліцкага раённага выканаўчага камітэта.
Як адзначыла начальнік аддзела архітэктуры і будаўніцтва Карэліцкага райвыканкама Ірына Казіміраўна Малышава, за 2012-2016 гады ў раёне знесена 256 старых дамоў і падмуркаў, у тым ліку па сельсаветах: Варанчанскі — 25, Ярэміцкі — 23, Жухавіцкі — 26, Красненскі — 39, Лукскі — 19 , Малюшыцкі — 46, Райцаўскі — 8, Турэцкі — 31, Цырынскі — 25, Мірскі — 14. У выніку праведзенай работы вызвалена 41,67 га зямель, з іх уведзена ў сельгасабарот 8,53 га, уключана ў пералік свабодных участкаў 4,2 га, прадастаўлена грамадзянам для вядзення асабістай падсобнай гаспадаркі — 0,86 га.
На правядзенне работ па зносу старых дамоў за 2012-2016 гады накіравана 85,3 тыс. рублёў, за 2017 год — 8,712 тыс. руб. На 1 лістапада 2017 г. у сельскай мясцовасці налічваюцца 10674 домаўладанні, у тым ліку незаселеных — 4643 (214 пустуючых, 4429 выкарыстоўваюцца для часовага пражывання).
— Уласнікам дамоў, па якіх ўстаноўлена месца жыхарства, накіроўваюцца паведамленні аб маючым адбыцца ўключэнні дома ў рэгістр пустуючых, — падкрэсліла І. К. Малышава. — Калі месца жыхарства ўладальніка дома невядома, прымаюцца меры па яго вышуку праз аддзел унутраных спраў Карэліцкага райвыканкама. У выніку вышуковых мерапрыемстваў устаноўлена месца жыхарства 16 грамадзян. У дачыненні да 27 грамадзян месца жыхарства не ўстаноўлена.
У выніку праведзенай работы 29 уласнікаў жылых дамоў апавясцілі раённы выканаўчы камітэт аб намеры выкарыстоўваць іх па прызначэнні, 2 заключылі дамовы куплі-продажу пасля падачы заяў у суд.
За 2017 год рашэннем Карэліцкага райвыканкама ў рэгістр пустуючых дамоў уключана 50 дамоў. Рашэннем суда Карэліцкага раёна 16 дамоў прызнаны безгаспадарнымі і перададзены ў сельсаветы. У дачыненні да 21 домаўладання дакументы накіраваны ў суд на разгляд.
На тэрыторыі раёна за 2017 год знесены 41 састарэлы дом. Уласнікі гэтага жылля не жылі ў ім на працягу апошняга года і не прымалі мер па прывядзенню дамоў у належны стан. Як адзначыла Малышава І. К., у гэтым пытанні маецца шэраг складанасцяў. Найбольш праблемныя пытанні ўзнікаюць з пошукам уласнікаў домаўладанняў, асабліва з тымі, хто жыве за межамі краіны. Пры накіраванні паведамленняў аб намеры далейшага выкарыстання імі домаўладання заказныя лісты вяртаюцца ў сувязі з незапатрабаванасцю. Гэтыя абставіны перашкаджаюць далейшай працы з домаўладаннямі.
Сельвыканкамам сумесна з землеўпарадкавальнай службай Карэліцкага райвыканкама неабходна праводзіць больш сістэмную работу па рэкультывацыі зямель у вёсках пасля зносу старых і пустуючых дамоў. Землі пасля зносу дамоў, падрыхтаваныя для выкарыстання, г.зн. без рэшткаў падмуркаў і старых пладовых дрэў, падлягаюць перадачы ў сельскагаспадарчы абарот. Так, за 2017 год знесены 41 стары і 10 пустых дамоў і толькі 3 участкі плошчай 0,7 га ўключаны ў пералік свабодных зямель.
Вызваленыя пасля зносу трухлявага жылля ўчасткі могуць быць прадастаўлены грамадзянам, якія маюць патрэбу ў паляпшэнні жыллёвых умоў. Для будаўніцтва і абслугоўвання аднакватэрных, блакіраваных жылых дамоў на 1 лістапада 2017 г. уключана ўсяго 230 участкаў на плошчы 46,88 гектара. Гэтыя зямельныя ўчасткі можна выкарыстоўваць пад касьбу, выпас жывёлы, для вядзення асабістай падсобнай гаспадаркі, займацца лесапасадкай.
Іна ЛЕЙКА.